Ուկրաինան հակահայկական պետություն է. 1991 թվականից ի վեր՝ այդ երկիրը երբեք չի թաքցրել իր հակահայ էությունը։ Դեռ Արցախյան առաջին պատերազմի տարիներին Ուկրաինան բոլոր ձևաչափերով՝ և՛ դիվանագիտական, և՛ ռազմական առումներով, օգնել է Ադրբեջանին։ Երբեք չպետք է մոռանալ, թե ովքեր էի ադրբեջանական կործանիչներով ռմբակոծում հայկական բնակավայրերը. դրանք ուկրաինացի օդաչուներ էին, Azg.am-ի թղթակցի հետ զրույցում ասաց քաղաքագետ Գագիկ Համբարյանը՝ անդրադառնալով շրջանառվող տեղեկություններին, որ մարտի 4-ին սպասվում է Ուկրաինայի նախագահ Վլադիմիր Զելենսկու այցը Երևան։
«Երբեք չպետք է մոռանալ, թե ինչպես էին ազգայնական УНА-УНСО խմբավորման ուկրաինացի հարյուրավոր ահաբեկիչներ առաջին պատերազմի ժամանակ մարտնչում մեր դեմ։ Ուկրաինան Ադրբեջանին ահռելի քանակությամբ զինտեխնիկա մատակարարողներից մեկն է եղել։ Պատերազմից հետո Ուկրաինան միջազգային բոլոր հարթակներում մշտապես պաշտպանել է Ադրբեջանի շահերը։
Արցախյան վերջին պատերազմի ժամանակ այդ երկիրն Ադրբեջանին սպիտակ ֆոսֆոր է մատակարարել, որը ադրբեջանցիներն օգտագործել են հայ զինվորների և խաղաղ բնակիչների դեմ։
Ահա այս ամենը հաշվի չառնելով՝ Նիկոլ Փաշինյանը Մյունխում հանձնարարություն է ստացել՝ մասնակցելու առավել գլոբալ ծրագրերի, այն է՝ Հայաստանի Հանրապետությունն այլևս բացահայտ մուտք է գործում հակառուսականության տիրույթ»,- ասաց Գագիկ Համբարյանը։
Քաղաքագետը հարց հնչեցրեց՝ եթե նույնիսկ Նիկոլ Փաշինյանին Արևմուտքից հանձնարարություն է տրվում՝ ընդունելու Ուկրաինայի նախագահ Վլադիմիր Զելենսկուն, նա արժանապատվություն չունի՞ մերժելու այդ հանձնարարականը։
«Զելենսկին հակահայ է։ Սա մեր ազգի և պետության ինքնասիրությունն է։ Նիկոլ Փաշինյանն այն վիճակի է հասցրել Հայաստանի Հանրապետությունը, որ իր արևմտյան տերերն արդեն չեն էլ հարցնում՝ նա ցանկանո՞ւմ է ընդունել Ուկրաինայի նախագահին, թե ոչ։ Նրան պարզապես պարտադրում են, որ որ ընդունի։
Վաղը չզարմանաք, որ Արևմուտքից Փաշինյանին պարտադրեն ընդունել նաև Իլհամ Ալիևին՝ ոտքերի տակ կարմիր գորգ փռելով։
Եթե Հայաստանը շարունակի ղեկավարել Փաշինյանը, վաղը-մյուս օրը նա Եռաբլուրն էլ է քանդելու, Հայոց ցեղասպանության հուշահամալիրն էլ է քանդելու»,- ամփոփեց Գագիկ Համբարյանը՝ հավելելով, որ ի պատասխան ՀՀ իշխանությունների հակառուսական պահվածքի՝ ՌԴ-ն սկսել է բացահայտ գործել Հայաստանի դեմ։
Հիշեցնենք, որ ավելի վաղ հայկական մամուլում տեղեկություն էր հայտնվել այն մասին, որ Զելենսկին առաջիկայում կայցելի Երևան, ըստ որոշ տեղեկությունների՝ այցը կկայանա արդեն մարտի 4-ին: Հայաստանի ԱԳՆ-ն ո՛չ հերքել, ո՛չ էլ հաստատել է տեղեկությունը՝ հայտարարելով, որ «բարձր մակարդակի այցերի մասին տեղեկատվությունը տրամադրվում է պատշաճ ժամկետներում»:
Հիշեցնենք նաև, որ օրերս ՀՀ վարչապետ Նիկոլ Փաշինյանը վերահաստատել էր՝ Ուկրաինայի դեմ պատերազմում Հայաստանը Ռուսաստանի դաշնակիցը չէ։ Մոսկվան իր հերթին հայտարարել էր, որ ի գիտություն է ընդունում Երևանի դիրքորոշումը։ «Դա կարևոր հայտարարություն է», – ասել էր ՌԴ նախագահի մամուլի խոսնակ Դմիտրի Պեսկովը։
