ՀԱՊԿ-ը չի պատրաստվում երես թեքել Հայաստանից։ Մոսկվա-Աստանա-Բիշքեկ-Երևան-Մինսկ տեսակամրջի ձևաչափով կայացած մամուլի ասուլիսի ժամանակ հայտարարել է ՀԱՊԿ գլխավոր քարտուղար Ստանիսլավ Զասը` պատասխանելով Sputnik Արմենիայի հարցին։
«Հայաստան դիտորդական առաքելություն ուղարկելու վերաբերյալ ՀԱՊԿ առաջարկները մնում են ուժի մեջ։ Եթե Հայաստանի Հանրապետությունն անհրաժեշտ համարի որոշում կայացնել միջոցառումների ամբողջ փաթեթի կամ առանձին կետերի վերաբերյալ, այդ թվում ՝ առաքելության վերաբերյալ, դա կարելի է իրականացնել, ընդ որում ՝ բավական օպերատիվ»,- ասել Է ՀԱՊԿ գլխավոր քարտուղարը։
Զասի խոսքով՝ ՀԱՊԿ-ն ակնկալում է, որ Հայաստանին օգնություն տրամադրելու համատեղ միջոցառումների մասին փաստաթուղթը կընդունվի։
«Այս առաքելության աշխատանքի արդյունքում պատրաստվել է Հավաքական անվտանգության խորհրդի որոշման նախագիծ՝ Հայաստանի Հանրապետությանը օգնություն ցուցաբերելու համատեղ միջոցառումների մասին, որը քննարկվել է Հավաքական անվտանգության խորհրդի նիստում։ Այս տարվա նոյեմբերի 23-ին Երևանում։ Ես հույս ունեմ, որ համապատասխան հավելումներից հետո մենք երկու կարևոր փաստաթղթերի փաթեթային որոշում կկայացնենք, Հայաստանին օգնելու և ՀԱՊԿ ԱԳ նախարարների՝ Հարավային Կովկասում խաղաղության աջակցման վերաբերյալ հայտարարություններ կընդունենք»,- հավելել է Ստանիսլավ Զասը։
Նա իր խոսքում անդրադարձել է նոյեմբերին, Երևանում տեղի ունեցած նստաշրջանին ու այդ կապակցությամբ իր դիրքորոշումը հայտնել.
«Երևանյան նստաշրջանի ավարտից հետո ես զարմացա, երբ կարդացի որոշ տեղեկություններ այն մասին, որ նիստն իբր տապալված է, գրեթե ձախողված է։ Ոչ մի նման բան, ես կտրականապես համաձայն չեմ սրա հետ։ Աշխատանքային նորմալ մթնոլորտ էր, պետությունների ղեկավարների կողմից ընդունվեց շատ կարևոր որոշումների մի ամբողջ ցանկ։ Ուստի ինչ-որ ձախողման մասին խոսելն առնվազն տեղին չէ»։
