Ալիևն ու Էրդողանն ուղղակի դողում են և սարսափի մեջ են հայ-կիպրական ռազմատեխնիկական համագործակցությունից, Azg.am-ի թղթակցի հետ զրույցում ասաց ռազմական փորձագետ Հայկ Նահապետյանը՝ անդրադառնալով ՊՆ այն հաղորդագրությանը, որ Հայաստանի և Կիպրոսի պաշտպանության նախարարները պատրաստակամություն են հայտնել գործակցել ընդգրկուն օրակարգով՝ ուսումնավարժական ծրագրեր, փորձի փոխանակում և ռազմատեխնիկական համագործակցություն։
«Մինչ հայկական կողմն ինչ-որ քննարկումներ է անում, Ադրբեջանը զենքի ռեալ գնումներ է կատարում Իսրայելից, մի քանի հարյուր միլիոն դոլարի հրատանի ձեռք բերելու պայմանավորվածություններ ունի Սերբիայի հետ։ Այսինքն՝ մեր հակառակորդ պետությունը պատրաստվում է նոր պատերազմի։
Սպառազինության գնումն Իրանի, Ռուսաստանի, Ղազախստանի կամ Թուրքիայի դեմ պատերազմի նպատակով չէ, այլ Հայաստանի դեմ։ Ադրբեջանը դեռ զինվում է, մեծացնում կրակային հզորությունը, ընդ որում՝ զինատեսակների մի մասը հարձակողական են, այսինքն՝ թիրախում մենք ենք» ,-ասաց Հայկ Նահապետյանը։
Ռազմական փորձագետը հիշեցրեց՝ հազիվ հարյուր տարվա պատմություն ունեցող Ադրբեջանը Հայաստանը համարում է Հարավային Կովկասի վրա օտար մարմին, որը պետք է հեռացվի։
«Ալիևն առանց սեթևեթանքի հայտարարում է, որ հայերը տարածաշրջանում եկվորներ են, և Հայաստանի չգոյությունն իրենց համար մարտավարական խնդիր է։ Իսկ իրենք շատ լավ գիտեն՝ ինչպես վերացնել Հայոց պետականությունը։ Դրա համար նրանք պատրաստ են օգնել, որպեսզի ՀՀ իշխանության ղեկին մնա Նիկոլ Փաշինյանը, իսկ իրենք զինվեն՝ հարմար աշխարհաքաղաքական իրողությունների պայմաններում Հայաստանի դեմ ռազմական գործողություններ սկսելու համար։
Սա ոչ միայն Հայոց պետականության վերջը կլինի, այլ 3 միլիոնանոց Հայաստանի վերջը։ Եթե որևէ մեկն ասի, որ սա իրականությունից հեռու է, և կարող է ցնորք թվալ, թող նայի, թե ինչպես աշխարհի պետությունների և ՄԱԿ-ի աչքի առաջ Իսրայելը փորձում է ցեղասպանության ենթարկել Գազայի՝ 2 միլիոնից ավելի պաղեստինցիներին։ Երբ ՄԱԿ-ի Անվտանգության խորհուրդը փորձում է սա կասեցնել, ԱՄՆ-ը դեմ է արտահայտվում»,- նշեց Հայկ Նահապետյանը։
Մեր զրուցակիցը շեշտեց՝ պետք է հասկանալ, որ ՀՀ իշխանություններն արդեն իսկ բացել են առաջին դուռը՝ Արցախը, իսկ ահա երկրորդ, երրորդ և հաջորդ հարվածները կարող ենք ստանալ և՛ Նախիջևանից, և՛ Սյունիքից, և՛ Տավուշից, և՛ Գեղարքունիքից։
«Ադրբեջանը խնդիր է դրել մեկ օրում վերցնել Երևանը՝ տանկային ճեղքում, մի քանի կողմից հարձակում։ Այնպես որ, այստեղ խոսքը միայն Սյունիքը կամ «Զանգեզուրի միջանցքը» չէ. այստեղ ամբողջ Հայաստանը վերցնելու խնդիրն է։
Մենք էլ կբողոքենք աշխարհին, տարբեր ամբիոններից կհայտարարենք, որ Ադրբեջանը շատ վայրագ է, բարբարոս է, բայց դրանից ոչին չի փոխվի»,- ասացռազմական փորձագետը։
Հիշեցնենք, որ այսօր մեկնարկել է ՀՀ պաշտպանության նախարար Սուրեն Պապիկյանի պաշտոնական այցը Կիպրոսի Հանրապետություն։
Կողմերն ամփոփել են համագործակցության ներկայիս ընթացքն ու նախանշել դրա զարգացման նոր հնարավորությունները` պատրաստակամություն հայտնելով գործակցել ավելի ընդգրկուն օրակարգով՝ ուսումնավարժական ծրագրեր, փորձի փոխանակում տարբեր ոլորտներում, ռազմատեխնիկական համագործակցություն և փոխադարձ հետաքրքրություն ներկայացնող այլ հարցեր:
