Հավանականությունը, որ էսկալացիայի նոր ցիկլ է սկսվում, մեծ է. քաղաքագետը՝ ադրբեջանական ագրեսիայի մասին

Հայ-ադրբեջանական սահմանին զինված միջադեպերի և լարվածության հավանականությունը բավականին մեծ է։ Սակայն թե որքանով այդ լարվածությունը կարող է վերաճել լայնածավալ պատերազմի, այս պահին դժվար է ասել , Azg.am-ի թղթակցի հետ զրույցում ասաց քաղաքագետ Դավիթ Հարությունովը։

«Մենք փորձ ունենք և գիտենք, որ Ադրբեջանն ավելի շուտ ձգտում է խնդիրները լուծել լոկալ, ավելի փոքր ծավալի գործողություններով։ Դա իր պատճառներն ունի. ադրբեջանական կողմն այսկերպ փորձում է նվազագույնի հասցնել Արևմուտքի կողմից բացասական արձագանքները։

Կրկնում եմ, ռազմական գործողությունների ծավալների մասին բարդ է կանխատեսումներ անել, բայց հավանականությունը, որ լարվածության, էսկալացիայի նոր ցիկլ է սկսվում, ցավոք սրտի՝ մեծ է։ Չի կարելի բացառել, որ միջադեպերն այսպես էլ լոկալ կմնան, բայց հավանականությունը մեծ է, որ սա լայնածավալ ինչ-որ բանի սկիզբ է»,- ասաց քաղաքագետը։

Դավիթ Հարությունովի խոսքով՝ նման զարգացումների պատճառ կարող է լինել Ադրբեջանի գայթակղությունը. այդ երկրի ղեկավարությունը հասկանում է, որ Հայաստանը  թույլ վիճակում է, իսկ ուժերի հարաբերակցությունը՝ հօգուտ Ադրբեջանի։

Երկրորդ պատճառն, ըստ մեր զրուցակցի, այն է, որ Ադրբեջանը Հայաստանի Հանրապետության տարածքների նկատմամբ ունի մի շարք հավակնություններ, որոնք քաղաքական քննարկումների ճանապարհով չեն բավարարվում։

«Ինչպես տեսնում ենք, բանակցությունները փաստացի պարալիզացված են, ինչն էլ հավանական է դարձնում, որ ադրբեջանական կողմը կփորձի ուժ գործադրել։ Նրանք այդ մոդելն արդեն մի քանի անգամ կիրառել են. ինչ-որ պահանջներ են ներկայացրել, որոնք ՀՀ իշխանությունները չեն ընդունել, բանակցությունները կանգնեցվել են, հետո Ադրբեջանն ուժ է կիրառել։

Ահա այս գործոնները հավանական են դարձնում, որ գործ ունենանք ռազմական գործողությունների հետ։ Բացի այդ՝ գարուն է մոտենում, իսկ մենք գիտենք, որ արդեն որերորդ տարին է՝ ադրբեջանական կողմը գարնանը ռազմական ակտիվություն է սկսում դրսևորել»,- ասաց Դավիթ Հարությունովը։

Հիշեցնենք, որ ՀԱՊԿ-ը հայ-ադրբեջանական սահմանին հակամարտության սրման մեծ հավանականություն է տեսնում, ՏԱՍՍ-ի փոխանցմամբ, ճեպազրույցի ժամանակ հայտարարել է ՀԱՊԿ միացյալ շտաբի պետ, գեներալ-գնդապետ Անդրեյ Սերդյուկովը՝ շեշտելով՝ «իրավիճակի կարգավորման համար խաղաղության պայմանագիր է անհրաժեշտ»։

«Որոշ պետությունների կողմից Հարավային Կովկասում դիրքերն ամրապնդելու, Կասպից ծովի ավազանի ռեսուրսներից օգտվելու, դեպի Կենտրոնական Ասիա ուղիղ ելք ապահովելու փորձեր են արձանագրվում», – ասել է Սերդյուկովը՝ նշելով, թե այդ նպատակին հասնելու համար ակտիվորեն օգտագործվում է նաև հայ-ադրբեջանական սահմանի բարձր կոնֆլիկտի հավանականությունը։