Այն, որ հատկապես վերջին ամիսներին Հայաստանի և Ռուսաստանի միջև քաղաքական մակարդակով լուրջ խնդիրներ կան, ակնհայտ է. այդ մասին փաստում են երկու կողմից հնչող հայտարարությունները, Azg.am-ի թղթակցի հետ զրույցում ասաց քաղաքագետ Տիգրան Գրիգորյանը՝ անդրադառնալով Հայաստանում ՌԴ դեսպան Սերգեյ Կոպիրկինի հայտարարությանը, որ այսօր, ինչպես երբեք, անհրաժեշտ է ամրապնդել հայ-ռուսական կապերը։
«Հայ-ռուսական հարաբերություններում ճգնաժամը, կարելի է ասել, արդեն հանրային դաշտ է դուրս եկել։ Հավանաբար նախկինում ևս նման խնդիրներ կային, բայց դրանք երբեք այսքան չէին հրապարակայնացվում»,- ասաց քաղաքագետը։
Նրա գնահատմամբ՝ քանի դեռ Ռուսաստանն ի վիճակի չէ կատարել Հայաստանի նկատմամբ իր դաշնակցային պարտավորությունները, դժվար է երկու երկրի հարաբերությունների հնարավոր լավացման մասին կանխատեսումներ անել։
«Երևի ճգնաժամը կշարունակվի և կխորանա. ճգնաժամի հիմնական պատճառն այն է, որ ինչ-որ պահից Ռուսաստանի համար Ադրբեջանի հետ լավ հարաբերություններ ունենալը շատ ավելի կարևոր դարձավ, քան Հայաստանի նկատմամբ մինիմալ պարտավորությունների կատարումը։
Այդ առումով մոտ ապագայում ես որևէ փոփոխության հիմք չեմ տեսնում։ Պարզ է, որ քանի դեռ Ուկրաինայում պատերազմը շարունակվում է, Ադրբեջանն ու Թուրքիան Ռուսաստանի համար կարևոր նշանակության խաղացողներ են, և այդ թվում նաև Հայաստանի շահերի հաշվին Ռուսաստանը փորձելու է լավ հարաբերություններ պահպանել այդ երկու երկրի հետ»,- ամփոփեց Տիգրան Գրիգորյանը։
