ՀՀ հարաբերությունները Վրաստանի հետ վերջին տարիներին գրանցել են էական առաջընթաց` ընդգրկելով երկկողմ օրակարգի բոլոր բնագավառները: ԱԺ արտաքին հարաբերությունների մշտական հանձնաժողովի այսօրվա նիստի ընթացքում այս մասին նշեց ՀՀ արտաքին գործերի նախարարի տեղակալ Մնացական Սաֆարյանը:
Փոխնախարարն հանձնաժողովի սեպտեմբերի 4-ի նիստում քննարկման ներկայացրեց «Հայաստանի Հանրապետության կառավարության և Վրաստանի կառավարության միջև դիվանագիտական ներկայացուցչությունների և հյուպատոսական հիմնարկների անձնակազմի ընտանիքի անդամների կողմից վարձատրվող գործունեություն իրականացվելու մասին» համաձայնագիրը վավերացնելու մասին» օրենքի նախագիծը:
Համաձայնագրի նպատակն է բարելավել դիվանագիտական ներկայացուցչությունների և հյուպատոսական հիմնարկների անձնակազմի ընտանիքների անդամների աշխատանքային հնարավորությունները:
Հարակից զեկույցում Լենա Նազարյանը տեղեկացրեց, որ վարձատրվող աշխատանքի թույլտվություն տալու է տվյալ երկրի ԱԳՆ-ն այն ժամանակահատվածի համար, որի ընթացքում դիվանագիտական ներկայացուցչությունները և հյուպատոսական հիմնարկների անձնակազմն ընդունող երկրում լինելու են հավատարմագրված: Նա նշեց նաև, որ աշխատանքի ընդունվող անձը ենթարկվելու է աշխատանքի ընդունող պետության ազգային օրենսդրությանը:
Հանձնաժողովը դրական եզրակացություն տվեց քննարկվող փաստաթղթին:
