Լոռիում պարեկների կողմից քաղաքացիներին ծեծի ենթարկելու մասին հրապարակումների վերաբերյալ Մարդու իրավունքների պաշտպանը պարզաբանումներ է պահանջել ՀՀ ոստիկանությունից, որի համաձայն՝ դեպքի կապակցությամբ նախաձեռնվել է քրեական վարույթ։ Այս մասին հայտնում են պաշտպանի գրասենյակից։
ՄԻՊ–ի գրասենյակից հայտնում են, որ ՄԻՊ ներկայացուցիչներին ոստիկանությունից նաև բանավոր հավաստիացվել է, որ դեպքի կապակցությամբ ծառայողներին ամրակցված տեսանկարահանող սարքերով արված տեսանյութերը պահպանվել են։
Պաշտպանը հաջորդիվ քրեական վարույթի վերաբերյալ պարզաբանումներ է պահանջելու նաև քրեական հետապնդման մարմիններից և իր ուշադրության կենտրոնում է պահելու քրեական վարույթի ընթացքը՝ բազմակողմանի, լրիվ և օբյեկտիվ քննության ապահովման նպատակով։
Ավելի վաղ «Հայաստան» խմբակցության պատգամավոր Քրիստինե Վարդանյանն ահազանգ է ստացել Լոռու մարզի բնակիչների, որ երեկ մի քանի քաղաքացիներ դաժան ծեծի են ենթարկվել Պարեկային ծառայության աշխատակիցների կողմից:
