Իշխանությունն իրեն հարց տվե՞լ է՝ շռնդալից կհաղթե՞ր, թե կպարտվեր, եթե Ալիևն ընտրությունների մասնակցեր Ալեն Սիմոնյանի և նրա քաղաքական թիմի կառուցած Հայաստանում։ Azg.am-ի թղթակցի հետ զրույցում նման հարց հնչեցրեց քաղաքագետ Բենիամին Մաթևոսյանը՝ անդրադառնալով ԱԺ նախագահի այն հայտարարությանը, թե «Կիրանցում, Ոսկեպարում ու մյուս գյուղերում 2026 թվականի ընտրություններում ՔՊ-ն հաղթելու է շռնդալից ձևով»։
«Որտեղի՞ց Ալեն Սիմոնյանին նման վստահություն. հավանաբար նման վստահությունը երկու հանգամանքով է պայմանավորված։ Առաջինը 2021 թվականի ընտրությունների արդյունքներն են. այն ամենից հետո, ինչ կատարվեց Արցախի և արցախցիների հետ, ո՛չ Կիրանցի, ո՛չ Ոսկեպարի բնակիչները չպետք է գնային և կողմ քվեարկեին Նիկոլ Փաշինյանին։ Ով ուզում է նեղանա, ով ուզում է չնեղանա, բայց սա փաստ է։
Եթե Կիրանցի բնակիչը կարծում էր, որ ինքը Շուշիի կամ Հադրութի բնակչից ավելի լավն է, կամ շուշեցուն կարելի է անտուն թողնել, իսկ իրեն՝ ոչ, ապա չարաչար սխալվում էր։ Նույնն, իմիջիայլոց, հիմա է. եթե Մասիսի, Արմավիրի, Էջմիածնի և Երևանի բնակիչները կարծում են, որ իրենք մեկ սանտիմետրով դրականորեն տարբերվում են Կիրանցի բնակիչների, և իրենց այս խնդիրը չի հասնի, մեղմ ասած՝ չարաչար սխալվում են»,- ընդգծեց Բենիամին Մաթևոսյանը։
Մեր զրուցակիցը հիշեցրեց՝ Կիրանցից ոչ շատ հեռու Շամշադինի շրջանն է, և հարց է, թե այդ շրջանից քանի հոգի է այս օրերին ներգրավված շարժմանը։
«Միգուցե թերի եմ հետևել, բայց շամշադինցիների չեմ տեսել։ Երկրորդ հռետորական հարցը. մենք հասկանում ենք չէ՞, որ ոչ միայն Կիրանցի հարցն է դրված, այլ ամենկարևորը՝ այսպես կոչված Զանգեզուրի միջանցքի հարցը։ Եթե ես չեմ սխալվում, իսկ ես չեմ սխալվում, «Զանգեզուրի միջանցքը» պետք է անցնի Սյունիքի մարզով։ Իսկ որևէ մեկը տեսե՞լ է, որ Սյունիքն այս ակցիաներին սատարի։
Երբ մենք այս հարցերը տալիս ենք, ունենք օբյեկտիվ հենակետեր։ Հիմա, եթե իրողություններն այսպիսին են, որևէ մեկը կարո՞ղ է բացառել, որ ինչ-ինչ գործընթացների արդյունքում Նիկոլ Փաշինյանը Շուռնուխում ևս բարձր արդյունքներ կգրանցի։ Չէ՞ որ պատերազմից հետո իշխանությունը Շուռնուխում հաղթեց։ Իշխանություններն այսքանը տեսել են, դրա համար էլ այսքան վստահ խոսում են»,- ասաց Բենիամին Մաթևոսյանը։
Ալեն Սիմոնյանի վստահության մյուս դրդապատճառը, ըստ քաղաքագետի, ընտրությունների ընթացքում վարչական լծակներ գործադրելու հնարավորությունն է։
«Այսինքն՝ Նիկոլ Փաշինյանը կարող է հրաժարական տալ, բայց շարունակի մնալ վարչապետ, և վարչական լծակները կիրառելով՝ գնա արտահերթ ընտրությունների։ Այդ պարագայում կարևոր չի լինի՝ ինչպես են քվեարկում, կարևոր կլինի, թե ինչպես են ձայները հաշվում։
Հիմա Ալեն Սիմոնյանն այս հանգամանքներից ելնելով՝ վստահ հայտարարություններ է անում»,- ամփոփեց մեր զրուցակիցը։
