Զիջումների պատրաստ ՀՀ իշխանությունները հիմա էլ ճնշումներ են գործադրում Արցախի իշխանությունների վրա. Թևան Պողոսյան

Գոյություն ունեն ճնշումներ, որոնց հիման վրա էլ որոշումներ են կայացվում։ Երբ ինձ հարցնում են, թե ինչ է վերջին շրջանում կատարվում Արցախում, ես պատասխանում եմ՝ ճնշումներ և պատերազմ. թուրքն ուզում է հային վերացնել, Արցախը վերացնել, հետո նաև՝ Հայաստանը, Azg.am-ի հետ զրույցում ասաց վերլուծաբան Թևան Պողոսյանը՝ անդրադառնալով Ռուբեն Վարդանյանի՝ ԱՀ պետնախարարի պաշտոնից ազատելու փաստին։

«Առկա ճնշումների պատճառով, չգիտեմ՝ ինչու, նման որոշումներ են կայացվում։ Այսօրվա դրությամբ միակ բանը, որ կարելի է հստակ ասել, այն է, որ Արցախում տեղի ունեցան զիջումներ՝ հանուն ինչ-որ բանի, որը, իմ պատկերացմամբ, պարզ կլինի մոտակա օրերին։

Ցավում եմ, որ Արցախի իշխանությունները, ունենալով պայքարի այսչափ պատրաստակամություն, չընտրեցին պայքարի ճանապարհը, այլ գնացին զիջումների»,- ասաց մեր զրուցակիցը։

Հարցին՝ հնարավո՞ր է, որ զիջումները կատարվել են Լաչինի միջանցքը բացելու դիմաց, մեր զրուցակիցը նկատեց՝ չպետք է մոռանալ, որ մինչև Ռուբեն Վարդանյանի պաշտոնանկությունն Ադրբեջանը բացահայտ ներկայացրել էր իր պահանջները՝ Կաշենի հանքն իրեն հանձնելու, Լաչինի միջանցքում ռենտգեն-սկաների տեղադրման, «Զանգեզուրի միջանցքի» տրամադրման առումներով, ավելի ուշ նաև Վարդանյանին աշխատանքից ազատելու պահանջ էր ներկայացրել։

«Հիմա մի քանի օրից կտեսնենք՝ Ռուբեն Վարդանյա՞նն է խնդիրը եղել, թե ոչ, Կաշենի հանքն աշխատելո՞ւ է, թե ոչ, ո՞վ է լինելու հանքի սեփականատերը, սկաներ սարքեր տեղադրվելո՞ւ են, թե ոչ»,- նշեց վերլուծաբանը։

Թևան Պողոսյանի խոսքով՝  Արցախի վրա ճնշումներ գործադրող կարելի է դիտարկել նաև Հայաստանի Հանրապետության իշխանություններին։

«Վստահ եմ՝ հենց ՀՀ իշխանություններից է ճնշումը գալիս, որովհետև Հայաստանն ինքը պատրաստ է զիջումների գնալ, հիմա էլ ճնշումներ է գործադրում Արցախի իշխանությունների վրա։ Այս պարագայում կտեսնենք, որ ՀՀ իշխանությունները կասեն՝ «Չէ՛,  պայքարում ենք և կպայքարենք մեր իրավունքների համար»։ Բայց տեսա՞նք այդ պայքարի պատրաստակամությունը. մենակ թողեցին Արցախին, հիմա ուզում են, որ ի՞նչ լինի»,- հարց հնչեցրեց վերլուծաբանը։

Հիշեցնենք, որ ԱՀ կառավարության երեկվա նիստում Արայիկ Հարությունյանը հրապարակել էր Ռուբեն Վարդանյանին պետական նախարարի պաշտոնից ազատելու մասին հրամանագիրը։