«Հարգելի խորհրդարան, երկու լավ նորություն ունեմ․ առաջին՝ ինչպես 90–ականներին՝ ապաշրջափակվելու ենք բոլոր առումներով, Հայաստանը, Արցախը տարածաշրջանում գործոն են դառնալու, երկրորդ լավ նորությունը՝ ՔՊ չի լինելու»,-ԱԺ այսօրվա արտահերթ նիստում ասաց «Հայաստան» խմբակցության պատգամավոր Աղվան Վարդանյանը։
Թույլ տվեք արտակարգ դատարաններից, ձեր մեքենաների արագությունից ձեզ բերել իրական օրակարգ. Արցախը շրջափակված է, Քարվաճառը հանձնված է, երկրորդ ճանապարհ չկա. իր ելույթում նշեց Աղվան Վարդանյանը։
Հիշեցնենք, որ Կառավարության երեկվա նիստին առաջարկվել է պաշտոնյաների կորտեժների թույլատրելի արագություն սահմանել 120 կմ/ժ-ը, ընդ որում՝ վրաերթերի դեպքում պատասխանատվությունը կրում է ոչ թե պաշտոնյան, որին տեղեփոխում է մեքենան, այլ մեքենայի վարորդը։ Աղվան Վարդանյանը «ձեր մեքենաների արագությունից ձեզ բերել իրական օրակարգ» ասելով՝ վերոնշյալ առաջարկը նկատի ուներ։
«ՔՊ–ի խոստացած երրորդ՝ Կապան–Ջրական ճանապարհը, կարծեմ, չի կառուցվել, հիմա էլ փակ է Բերձոր–Լաչին միջանցքը, որը, կարծեմ, նախկիններն են բացել։ Ծայրահեղ սահմանային իրավիճակ: Նոր բան չէ, 90-92-ին էլ էր Արցախը շրջափակված բոլոր կողմերից, Հայաստանի հետ միակ կապն ուղղաթիռն էր․ բայց կա մի աննշան տարբերություն՝ այն ժամանակ և՛ Արցախում, և՛ ՀՀ–ում իշխանություն կար, երկուսի նպատակը նույնն էր՝ անկախ պետականություն և Արցախ, Արցախն իբրև անկախ պետականության հիմք։ Հիմա Հայաստանում ՔՊ իշխանությունն է՝ առանց պետական մտածողության, առանց Արցախի, իշխանություն՝ իշխանության համար»,-շեշտեց պատգամավորը։
