Բայց դա հա՞րց է, որ ինձ հիմա տալիս եք, կներեք էլի։ Azg.am-ի թղթակցի հետ զրույցում նման կերպ արձագանքեց ԱԺ «Քաղաքացիական պայմանագիր» խմբակցության պատգամավոր Արման Եղոյանը՝ անդրադառնալով մեր այն հարցին՝նորմա՞լ է, որ իր գործընկեր, ՔՊ-ական պատգամավոր Հովիկ Աղազարյանն Ադրբեջանի դրոշը Երևանում այրելու արարքը դատապարտող իր ֆեյսբուքյան գրառման մեջ հայ ազգին «վայրի ու մարդակեր» ցեղ է անվանում։
«Այդ մասին պետք է խոսե՞նք, ուզում եք խոսե՞լ այդ մասին։ Ես չեմ ուզում խոսել, չէ, ես դա չեմ մեկնաբանում։ Ես ամեն ինչի մասին չէ, որ մեկնաբանություն անում եմ։ Ես մեկնաբանում եմ այն երևույթները և խոսքերը, որոնք նպատակահարմար եմ գտնում»,- ասաց նա։
Հաջորդ հարցին՝ իր կարծիքով չկա՞ պատճառ, որպեսզի հայ մարդը չհանդուրժի Երևանի կենտրոնում ադրբեջանական դրոշի ծածանվելը, Արման Եղոյանը պատասխանեց.
«Դուք, ախր, այդ հարցի պատասխանը գիտեք էլի»։
Դիտարկմանը, որ իր կարծիքը տվյալ հարցի շուրջ չգիտեմ և հենց այդ պատճառով էլ զանգահարել եմ, իշխանական պատգամավորը շարունակեց.
«Կարծիքի հարց չի, դա նորմերի հարց է, կարծիքի հարց այստեղ չկա։ Երևանի կենտրոն ասվածը շատ լայն հասկացություն է․ գոյություն ունի կոնտեքստ՝ ամեն ինչի։ Երևանի կոնյակի գործարանում հիմա այդ դրոշը դրված է՝ Երևանի կենտրոնում, Դուք գիտե՞ք։
Կոնտեքստից է կախված։ Կոնկրետ որտեղ է եղել դեպքը, կասե՞ք»։
Հիշեցմանը, որ Մարզահամերգային համալիրում Եվրոպայի ծանրամարտի առաջնության բացման արարողությանը, Եղոյանը նկատեց.
«Դե, կոնտեքստ է, իսկ Դուք ոնց եք կարծում։ Դուք հարցը կիսատ եք տալիս, ասում եք՝ Երևանի կենտրոն։ Երևանի կենտրոնում կարող են լինել միլիոնավոր կոնտեքստներ, Երևանի կենտրոնում հազարումի միջոցառում կարող է լինել»։
Իսկ կա՞ կոնտեքստ, որն իրեն կստիպեր հարկ եղած դեպքում բռնել ադրբեջանական դրոշը, հետաքրքրվեցինք Արման Եղոյանից.
«Ախր չի կարելի, էլի։ Էս դաշտը վերածել եք ոչ մի բանի մասին խոսակցությունների ։ Ձեր հարցը, կներեք, բայց սխալ և թերի է ձևակերպված։ Էդ նույն հաջողությամբ պետք է ասեք՝ Հայաստանը կարո՞ղ է կազմակերպել ծանրամարտի առաջնություն։ Եթե դրոշը պետք չէ, ուրեմն միգուցե պետք չէ՞ կազմակերպել ընդհանրապես»։
Հիշեցմանը, որ մեր հարցն ընդամենն այն մասին էր՝ արդյոք հայ մարդը կարող է չհանդուրժել Երևանում ադրբեջանական դրոշի ծածանումը, ինչն էլ իր հերթին ծնել է ՔՊ-ական պատգամավորի՝ միջազգային հանրությունից ներողություն խնդրելու և հայ ազգին որոշ բացասական բնորոշումներ վերագրելու հայտնի գրառումը, Եղոյանը կրկին պնդեց՝ մեր հարցը սխալ է ձևակերպված։
Հ.Գ. Վերջում իշխանական պատգամավորին հորդորեցինք չսովորեցնել՝ ինչ հարց և ինչպես ձևակերպել, այլապես մենք էլ կարող ենք պնդել, որ նրա պատասխաններն են թերի և խուսափողական։
