Ռուսաստանի անվտանգության խորհրդի փոխնախագահ Դմիտրի Մեդվեդևը հայտարարել է, որ ՆԱՏՕ-ի հրթիռների օգտագործումը Ռուսաստանին իրավունք է տալիս դա որակել որպես հարձակում Ռուսաստանի վրա և զանգվածային ոչնչացման զենքով պատասխան հարված հասցնել Կիևին և դաշինքի հիմնական օբյեկտներին:
Նոյեմբերի 17-ին հայտնի դարձավ, որ ԱՄՆ նախագահ Ջո Բայդենը Ուկրաինայի զինված ուժերին թույլ է տվել հեռահար զենքով հարվածներ հասցնել Ռուսաստանի տարածքի խորքերին: «Reuters»-ի աղբյուրները հայտնել են, որ Ուկրաինան նախատեսում է իր առաջին հեռահար գրոհներն իրականացնել առաջիկա օրերին:
«Կարևորն այն է, ինչի մասին ասել է ռուսական պետության ղեկավարը։ Եվ որպես արդյունք այսօր հաստատվել է միջուկային զսպման ոլորտում պետական քաղաքականության հիմունքների նոր տարբերակը։ Դաշինքի հրթիռների օգտագործումը կարելի է որակել որպես դաշինքի երկրների հարձակում Ռուսաստանի վրա։Այսդեպքում իրավունք է առաջանում զանգվածային ոչնչացման զենքով պատասխան հարված հասցնել Կիևին և ՆԱՏՕ-ի հիմնական օբյեկտներին, որտեղ էլ լինեն դրանք։ Եվ սա արդեն WWIII –ն է: Միգուցե ծերուկ Բայդենն իսկապես որոշել է գեղեցիկ հեռանալ կյանքից՝ իր հետ տանելով մարդկության զգալի մասին», – գրել է Նա Telegram-ում։
Մեդվեդևը նաև նշել է, որ ԶԼՄ-ների հրապարակումները քարոզչական նպատակ ունեն։
«Երբ արևմտյան թերթերի բարձրացրած փոշին մի փոքր նստեց, ակնհայտ դարձավ, որ չնայած հրապարակումների ակնհայտ քարոզչական բնույթին, տեղի ունեցածը կարող է շատ լուրջ հետևանքներ ունենալ», – գրել է նա։
Հիշեցնենք` ՌԴ նախագահն այսօր հաստատել է միջուկային զսպմանոլորտում ՌԴ պետական քաղաքականության հիմունքները:
