Azg.am-ի զրուցակիցն է ԱՀ Ազգային ժողովի «Արդարություն» խմբակցության պատգամավոր Մետաքսե Հակոբյանը։
-Տիկի՛ն Հակոբյան, օրերս կայացած մամուլի ասուլիսի ժամանակ ՀՀ վարչապետ Նիկոլ Փաշինյանն ուղիղ հայտարարեց, որ Ադրբեջանի 86 600 քառ կմ տարածքը ներառում է նաև Լեռնային Ղարաբաղը։ Դուք, որպես արցախցի և Արցախի խորհրդարանի պատգամավոր, ինչպե՞ս ընդունեցիք նրա այս հայտարությունը։
-Այն, որ հայտարությունն անսպասելի չէր, միանշանակ է։ Հետևաբար որևէ ավելորդ հուզականություն չկար։ Կոնկրետ մեր քաղաքական ուժը և ես, որպես քաղաքական գործիչ, ձևավորվել ենք 2018-ի ամռանը։ Մեր կուսակցությունն ստեղծվեց՝ նպատակ ունենալով թույլ չտալ, որ նիկոլիզմը մուտք գործի Արցախ։ Ցավոք, մենք չկարողացանք մեր ժողովրդին բացատրել սպասվող վտանգների մասին, ժողովուրդը չցանկացավ դա լսել, և արդյունքում Արցախում ձևավորվեց ՀՀ իշխանությունների սրտի իշխանությունը։ Նրանք կարողացան մեզ բերել-հասցնել այսօրվա իրավիճակին, այնպես որ, մենք դեռևս 2018 թվականի ամռանը տեսնում էինք այս օրը։ Մենք դեռ այն ժամանակ զգուշացնում էինք այսօրվա մասին։
Երբ օրեր առաջ դիտում էի Նիկոլ Փաշինյանի մամուլի ասուլիսը, արձանագրեցի մի կարևոր փաստ, որ մինչ մայիսի 22-ն իշխանությունը զավթածները արևմտյան տարբեր տեխնոլոգիաներ էին կիրառում, մանիպուլյացնում ժողովրդին։ Այդ օրը մանիպուլյացիա չկար, այդ օրն ամեն ինչ հստակ էր, որոշումը կայացված էր։ Այդ օրը ՀՀ վարչապետն առաջին անգամ օգտագործեց իր երկաթե մուրճը՝ հարվածելով 10 միլիոն հայերի գլխին։ Նա, որպես իշխանություն, հային զրկեց Արցախից, հետևաբար՝ աշխարհում գոյություն ունենալու իրավունքից և սկիզբ դրեց ՀՀ բզկտման։
Մենք այժմ ունենք անձ, որն այսօր առանց վարանելու հայտարարում է Արցախից ազատվելու մասին։ Խնդրում եմ հիշել 2008-ի մարտի 1-ին նրա կողմից հնչած կոչերը, որ ղարաբաղցիներին պետք է վռնդել Երևանից։ Ի վերջո, 15տարի անց նա հասավ իր երազանքին։ Այնպես որ, դա հստակ պլանավորած ծրագիր էր, որն իրենք արդեն իսկ չեն թաքցնում։ Եթե դեռևս ամիսներ առաջ համարում էինք, որ դա սին մեղադրանք է, հիմա իրենք դա չեն թաքցնում, որովհետև, ըստ էության, իրենց պլանի մեծ մասը կատարել են։
2021 թվականի ընտրություններից հետո ՀՀ վարչապետը շոշափում էր ժողովրդի տրամադրությունները։ Ամենակարևոր թեզը, որի վրա հիմնված էր իրենց նախընտրական թեզն, Արցախի անջատումն էր՝ հանուն փրկության։ Նախօրեին տեղի ունեցած ասուլիսում Նիկոլ Փաշինյանը հայտարարեց, որ դա կեղծ ու դատարկ թեզ է։
Ես, անկեղծ ասած, առաջին անգամ եմ հանդիպում քաղաքական թիմի, որը բացահայտ կխոսի իր կողմից կատարված խաբեության մասին և որևէ արձագանք չի ստանա։ Նիկոլ Փաշինյանը, վստահություն ունենալով, որ հակազդեցություն չի ունենալու, հիմա ավելի ամուր քայլերով է առաջ գնում։
-Տիկի՛ն Հակոբյան, ԱՀ նախագահ Արայիկ Հարությունյանը երեկ հանդես եկավ ՀՀ իշխանություններին ուղղված կոչով՝ ձեռնպահ մնալ Արցախը Ադրբեջանի կազմում ճանաչելու որևէ գործողությունից ու հայտարարությունից։
Հավատո՞ւմ եք այս կոչի անկեղծությանը՝ հաշվի առնելով, որ ԱՀ այսօրվա իշխանություններին համարում եք ՀՀ գործող ռեժիմի սրտի իշխանություն։
-Ուղերձը բավականին հայրենասիրական էր, ոչ ոք հակառակը չի կարող պնդել։ Բայց ես, որպես ԱՀ քաղաքացի, տեսնում եմ Արայիկ Հարությունյանի թուլությունը. նա ինքն է խոստովանում, որ տարբեր ճնշումների է ենթարկվում՝ թե՛ արտաքին, և թե՛ ներքին։ Ըստ էության՝ նա Նիկոլի պրոյեկտներին օգնել է ներմուծվել Արցախ և տեղակայվել նախագահական նստավայրում, կառավարությունում և ավելին՝պաշտոններ ակնկալել։ Նա համարում է, որ դա արել է՝ պառակտումից զերծ մնալու համար, այն դեպքում, երբ այդ գործելաոճը ժողովրդին խուճապի է մատնում։
Ամենակարևորն այն է, որ ես, որպես ԱՀ քաղաքացի, Արայիկ Հարությունյանի ուղերձում փնտրեցի և չգտա ինձ։ Ես տեսա ընդամենը մեկ նախադասություն, որ պետք է շարունակենք պայքարը։ Ես, որպես քաղաքացի, պատրաստ եմ ամեն վայրկյան պայքարել, պայքարել ծայրահեղ միջոցներով, սակայն ես ուղերձում չտեսա պայքարի մեխանիզմները, ծրագիրը։ Ուղերձն ինձ համար ուղղակի պաթոս էր, չկար ռազմավարություն։ Ես ինչպե՞ս պիտի պայքարեմ՝ արդյոք միայն սնունդ հայթայթելով։ Ո՞րն է իմ պայքարը, ես հստակ ուզում եմ իմանալ։ Ես այդ հարցի պատասխանն այդպես էլ չտեսա։
Մենք վաղուց արդեն սպառել ենք մեզ տրված ժամանակը։ Եթե ուղերձը երեկ էր, արդեն երեկ էլ գործողություններ պետք է լինեին, որովհետև եթե չկանխենք ՀՀ վարչապետի՝ Արցախը հանձնելու մոլուցքը, վաղն արդեն ուշ կլինի։
-Տիկի՛ն Հակոբյան, ՔՊ-ական պատգամավոր Գուրգեն Արսենյանն այսօր ԱԺ-ում հայտարարեց, որ իր լիակատար աջակցությունն է հայտնում Նիկոլ Փաշինյանի քաղաքականությանը, և հարևան երկրների հետ վճռականորեն պետք է գնալ խաղաղության։
Բացի այդ՝ պատասխանելով այն հարցին, թե ինչու է անտեսվում արցախցու կարծիքը, եթե նա իրեն չի տեսնում Ադրբեջանի կազմում, ասաց, որ որպես ՀՀ պատգամավոր՝ առաջնորդվում է ՀՀ պետական շահերով։ Իշխանական պատգամավորը հավասարության նշան դրեց Արցախում, Ջավախքում և Գլենդեյլում բնակվող հայերի միջև՝ նշելով, որ ՀՀ պետական գործիչների առաջնային խնդիրը Հայաստանի շահերի սպասարկումն է։ Ի՞նչ կասեք սրա մասին։
-ԱԺ այսօրվա նիստի մի հատվածը նայելուց հետո ինձ համար նոր բան հայտնաբերեցի. Հայաստանում կան հայեր և կան նիկոլներ։ Գուրգեն արսենյանները նիկոլներ են։ Իշխանական գործիչներից յուրաքանչյուրը դերակատարություն ունի, յուրաքանչյուրը էժան վարձատրվող դերասան է, որը սեփական գրպանի կայունության համար ծառայություններ է մատուցում ՀՀ վարրչապետին։
Կոնկրետ Գուրգեն Արսենյանը բարձրախոս է, նրա նման մի քանիսը կան։ Այն մտքերը, որոնք ավելի լկտի ձևով կարելի է մեկնաբանել, իրենք են ասում։ Սրանից առաջ էլ ասում էր, որ պետք է 120 հազար հայի զոհեն, որ 3 միլիոնին փրկեն։ Այս մարդիկ հայրենիք չունեն։ Գնալով համոզվում եմ, որ «յան» վերջավորությամբ ազգանունը դեռ չի նշանակում, որ մարդը հայ է։
Ի դեմս Գուգեն Արսենյանի՝ իմ առջև կանգնած է հայի՝ արցախցի տեսակին ատող անձ, որն անձնական խնդիրներ է լուծում՝ ունենալով մանդատ։ Ես վստահ եմ, որ իրենք, Ալիևից ոչ պակաս, ուզում են արցախահայության և Արցախի վերջը տալ։ Իրենք նույն ծրագրի դերակատարներն են։
