Եթե շարժման տակ քաղաքական հենք, ծրագիր չդրվի, ցավոք սրտի, հավանական է, որ շարժումն այդպես էլ կմարի. քաղաքագետ

Բագրատ սրբազանի գլխավորած շարժումը ցույց տվեց, որ հանրության մեջ շատ լուրջ հակաիշխանական տրամադրություններ կան, և իշխանությունը շատ լուրջ պրոբլեմներ ունի, Azg.am-ի թղթակցի հետ զրույցում ասաց քաղաքագետ Արմեն Բաղդասաարյանը։

«Բայց այլ հարց էլ կա. Հայաստանի անվտանգային պրոբլեմներն այս պահին արտաքին քաղաքական են, աշխարհաքաղաքական են։ Իսկ այդ հարցերը կարող են լուծել ՀՀ իշխանությունները, որոնք, սակայն, դա չեն անում։ Հետևաբար ներքաղաքական պրոբլեմներ են առաջանում, այսինքն՝ մեր պրոբլեմներն ինչպես ներքաղաքական, այնպես էլ արտաքին քաղաքական են։

Իսկ մեկնարկած շարժման մեջ քաղաքական բովանդակություն, ցավոք, առայժմ չկա, և եթե շարժման տակ քաղաքական հենք չդրվի, քաղաքական ծրագիր չդրվի, այո՛, ցավոք սրտի, հավանական է, որ շարժումն այդպես էլ կմարի։ Այսինքն՝ շարժումը պրոբլեմ ունի. եթե շարժումը հիմնված է միայն փիլիսոփայական, ճշտի, ճշմարտության և աստվածաբանական ընկալումների վրա, պետք է հիշել, որ աշխարհում խնդիրներն այդ ընկալումների հարթությունում չէ, որ լուծվում են։ Ահա սա խնդիր է լինելու, և շարժումը կարող է մարել»,- ասաց քաղաքագետը՝ հավելելով, որ եթե չենք ուզում իրադարձությունները զարգանան այդ սցենարով, պետք է շարժման տակ շատ արագ քաղաքական հենք դրվի։

Արմեն Բաղդասարյանի խոսքով՝ շարժման դինամիկային հետևելիս ակնհայտ է դառնում, թե ինչ  թափով և հզորությամբ այն սկսվեց և ինչպես է աստիճանաբար պասիվանում։

Քաղաքագետը միաժամանակ նշեց՝ ինքը շատ լավ հասկանում է, որ շարժման համար քաղաքական հենք ապահովելն իր մեջ խնդիրներ ունի, որովհետև դա խոցելի կդարձնի շարժումը։

«Բայց, ամեն դեպքում, շարժումն առանց դրա աստիճանաբար կարող է մարել, որովհետև որքան էլ մարդկանց համակրանքն այդ շարժման, հրապարակում հնչած մտքերի  կողմը լինի, միևնույն է, եթե մարդիկ դրանք իրականացնելու հստակ մեխանիզմներ չեն տեսնում, շարժման հետևից չեն գնալու։

Վարչապետի հրաժարականին հասնելու երկու ճանապարհ կա՝ առաջինն իմպիչմենտի գործընթաց խորհրդարանում, որն իրատեսական չէ, և երկրորդ՝ այդ նույն իմպիչմենտը՝ համազգային, համաժողովրդական հզոր ճնշման ներքո։

Եթե առաջինը հնարավոր չէ, ապա երկրորդի համար այդպիսի հզոր ալիք բարձրացնելու համար պետք է քաղաքական բաղադրիչ և հստակ ճանապարհային քարտեզ։ Եթե դա չի արվում, և ընդամենը պահանջ է ներկայացվում իշխանափոխության, ապա, այո՛, վարչապետի հրաժարականը պահանջելն իսկապես շտապողականություն է։

Նախ պետք է ներկայացնել քաղաքական ծրագիր, որի հետևից կգնար համաժողովրդական ալիքը, որի ճնշման տակ էլ հնարավոր կլիներ իշխանափոխություն իրականացնել»,- ամփոփեց մեր զրուցակիցը։