Երբ ՔՊ-ական պատգամավոր Գուրգեն Արսենյանը հայտարարում է, որ Հայաստանը 30-ամյա պաշարված ամրոցի ռեժիմից անցում է կատարում բաց, խաղաղ, փոխշահավետ համագործակցության ռեժիմի, թող չմոռանա, որ նույն այդ երկիրը 30 տարի ուներ ինքնասիրություն, իր իրավունքները պաշտպանելու հնարավորություն և վերջին հաշվով հաղթանակած պետություն էր, Azg.am-ի թղթակցի հետ զրույցում ասաց քաղաքագետ Գագիկ Համբարյանը։
«Ես չգիտեմ՝ ո՞րն է Գուրգեն Արսենյանի համար խաղաղությունը, կամ ո՞ւմ հաշվին է նա այսքան ժամանակ հանգիստ ու խաղաղ ապրում՝ Վարդենիսի, Սոթքի, Կապանի, Գորիսի, Ջերմուկի, Ներքին Հանդի ու Իշխանասարի բնակչի՞ կյանքի և առողջության հաշվին։ Իսկ նույն Գուրգեն Արսենյանը կարո՞ղ է ասել, թե ինչ է լինելու իրենց կառավարման տարիներին օկուպացված ՀՀ տարածքների հետ։
Ադրբեջանը 2020 թվականի նոյմեբերի 9-ից հետո երկու Երևանի չափ տարածք է գրավել։ Այդ տարածքները հետ բերվե՞լ են, որ ՔՊ-ական պատգամավորըւ խաղաղության մասին է խոսում։ Մենք մեր պատմական հողերից 14 հազար ք/կմ կորցրել ենք. ես դա ասում եմ՝ ըստ Նիկոլ Փաշինյանի, որովհետև նա հայտարարում էր, որ Արցախը Հայաստան է և վերջ։ Հիմա Հայաստանից կորցրել ենք 14 հազար ք/կմ, և Արսենյանը համարում է, որ խաղաղությո՞ւն է եղել»,-հարց հնչեցրեց քաղաքագետը։
Գագիկ Համբարյանի համոզմամբ՝ Ադրբեջանը երբեք թույլ չի տա, որ Հայաստանը խաղաղ ապրի կամ զարգանա, ինչի վառ օրինակը Ադրբեջանի ագրեսիվ պահվածքն է՝ Հայաստանի որ հատվածում ինչ գործարան կարող է կառուցվել կամ չկառուցվել։
«Ադրբեջանցին այսօր որոշում է, որ Երասխում չպետք է մետալուրգիական գործարան լինի և Հայաստանին թույլ չի տալիս այն կառուցել։ Նիկոլ Փաշինյանի և Գուրգեն Արսենյանի օրոք Հայաստանը վերածվել է, կներեք արտահայտությանս համար, բանանային «չնթռլո» երկրի, և հիմա սեփական պարտությունները, պետությունը նսեմացնելու բոլոր գործողությունները մեկնաբանել վարդագույն երանգներով կարող է միայն այս երկրի թշնամին»,- ասաց քաղաքագետը։
Հիշեցնենք, որ ՔՊ-ական պատգամավոր Գուրգեն Արսենյանն այսօր լրագրողներին ասել էր՝ «Անցնում ենք 30-ամյա պաշարված ամրոցի ռեժիմից բաց, խաղաղ, փոխշահավետ համագործակցության ռեժիմին, մենք այդ պատրաստակամությունն ենք հայտնում համայն աշխարհին»,- ապա հավելել՝ հայ-ադրբեջանական 30-ամյա ամենօրյա տաք կամ սառը պատերազմն այս պահին ավարտվել է»։
