Ադրբեջանի նախագահի հայտարարոսւթյունը, որ «Ղարաբաղի հայերին մնում է մեկ ճանապարհ՝աղբարկղը նետել կեղծ պետական ատրիբուտները, լուծարել խորհրդարանը և ենթարկվել Ադրբեջանի օրենքներին», լիովին տեղավորվում է ուժի սպառնալիքի գործադրման տեխնոլոգիայի շրջանակներում։ Սա հրապարակային տեխնոլոգիա է, երբ մի երկրի ղեկավարը բացահայտ սպառնում է մեկ այլ երկրի ղեկավարությանը՝ պահանջելով կատարել իր կարգադրությունները։ Azg.am-ի թղթակցի հետ զրույցում այս մասին ասաց քաղտեխնոլոգ Արմեն Բադալյանը։
Հարցին՝ արդյոք համարժեք է գնահատում Ալիևի այսօրինակ սպառնալիքներին Արցախի իշխանությունների արձագանքը, մեր զրուցակիցը բացասական պատասխան հնչեցրեց։
«ԱՀ իշխանությունների արձագանքն, իհարկե,բավարար չէր։ Միակ բավարար արձագանքն այն կլինի, եթե Արցախի ղեկավարությունն առաջնահերթ կերպով փոխի նախագահին, որովհետև գործող նախագահ Արայիկ Հարությունյանն այն քաղաքական թիմի ներկայացուցիչն է (ՀՀ քաղաքական թիմի), որը մեղսակից է Արցախի այսօրվա ճակատագրին։
Արցախահայությունը և ԱՀ ղեկավարության այն հատվածը, որը չի ցանակնում հայտնվել Ադրբեջանի կազմում և կատարել Իլհամ Ալիևի հրահանգները, պետք է իշխանափոխություն անեն և շուտափույթ կերպով պաշտոնից զրկեն Արայիկ Հարությունյանին։
Արցախում պետք է պաշտոնավարի այնպիսի նախագահ, որը հրապարակային, գործուն քայլերով կմերժի ոչ միայն Ադրբեջանի, այլ նաև ՀՀ իշխանությունների վարած քաղաքականությունը։ Այլապես միայն «հուժկու» հայտարարությունները բավարար չեն։ Քանի դեռ Արցախում բավարարվում են զուտ հայտարարություններ անելով, ենթադրում եմ՝ ԱՀ ղեկավարությունն այդքան էլ դեմ չէ մնալ Ադրբեջանի կազմում»,- ասաց Արմեն Բադալյանը՝ հավելելով, որ Ադրբեջանին Արցախից հղված լավագույն ուղերձը կլինի Արայիկ Հարությունյանի հեռացումը։
Դրանից հետո, ըստ քաղտեխնոլոգի, պետք է անցում կատարել ուժային կառույցներին։ Հաջորդ քայլով էլ պետք է հստակեցնել Արցախի քաղաքացիների ցանկությունը։
