Այն, որ տեսչական մարմինը երեք օր ժամանակ է տվել և հնարավոր է՝ առաջնային թերությունները վերացնելուց հետո «Մալաթիա» տոնավաճառը կրկին վերաբացվի, իշխանության կողմից գործադրված պարզունակ PR քայլ է, Azg.am-ի թղթակցի հետ զրույցում ասաց քաղտեխնոլոգ Արմեն Բադալյանը։
Նրա խոսքով՝ նման «ներողամիտ» պահվածքը կարող է պայմանավորված լինել այս տարի աշնանը կայանալիք Երևանի քաղաքապետի ընտրություններով՝ ամեն կերպ շահելու ընտրազանգվածի համակրանքը։
«Սա ՀՀ իշխանությունների ձեռագիրն է. երբ որևէ գործընթացի արդյունքում մեծ դիմադրության են հանդիպում, անմիջապես նահանջում են։ Չի բացառվում, որ «Մալաթիա» տոնավաճառի հարցը ինչ-որ ձևով լուծեն, որովհետև իշխանությանը ձեռնտու չէ, որ Երևանի ավագանու ընտրություններից առաջ մայրաքաղաքում դժգոհության ալիք բարձրանա»,- ասաց քաղտեխնոլոգը՝ միաժամանակ հիշեցնելով, որ տոնավաճառի որոշ աշխատակիցներ, անկախ դրա փակ կամ բաց լինելուց, պատրաստակամ են կրկին իշխանությանը ձայն տալ։
Մյուս կողմից, ըստ Արմեն Բադալյանի, Հայաստանում ընտրություններով վաղուց ոչինչ չի որոշվում, քանի որ դրանք վերածվել են ձևական գործընթացի։
«Այսինքն՝ եթե անգամ տոնավաճառը փակվի, դա չի խանգարելու իշխանության թեկնածուին դառնալ Երևանի քաղաքապետ։ Պատճառն այն է, որ ազդեցիկ որևէ այլ ուժ այս պահի դրությամբ ընտրություններին մասնակցելու հայտ չի ներկայացրել։ Հայաստանում ընտրություններն ընդամենը հաստատում են, վավերացնում արդեն եղած փաստը»,- նշեց մեր զրուցակիցը։
Վերջում քաղտեխնոլոգը չբացառեց, որ «Սուրմալու» տոնավաճառի օրինակով, մի քանի օր փակ մնալուց հետո, «Մալաթիա» տոնավաճառը ևս վերաբացվի՝ ցույց տալու, որ պետությունը չի ուզում 600 մանր և միջին տնտեսվարողի անաշխատանք թողնել։
Հիշեցնենք, որ երեկ ՀՀ քաղաքաշինության, տեխնիկական և հրդեհային անվտանգության տեսչական մարմնում տեղի է ունեցել Տեսչական մարմնի ղեկավարի և մասնագետների հանդիպումը տոնավաճառի տնօրինության և աշխատակիցների հետ։
Տոնավաճառի տնօրեն Սամվել Ավետիսյանն էլ այսօր News.am-ին ասել է, որ հնարավոր է՝ փետրվարի 4-ին, շուկան վերսկսի աշխատանքը, եթե մինչև այդ վերացվեն այն խախտումները հրատապ կարգով վերացվեն։
«Մեզ ցուցումներ են տվել, թե ինչ պետք է առաջնահերթ անենք։ Ամենավտանգավոր մասերը պետք է վերացնենք, խոսքը հրդեհավտանգ առաստաղների, բաց հոսանքների մասին է։ Իրենք ընդառաջ են գնում մեզ, որ մենք շատ կարճ ժամանակամիջոցում ավարտենք այդ աշխատանքները։
Այսօր վաղ առավոտից սկսել ենք աշխատանքները, երկու օրում պետք է հասցնենք ավարտել, որ շաբաթ օրը շուկան վերսկսի աշխատել։ Շուկայի աշխատակիցների մեծ մասն այստեղ է, մեզ օգնում են, աշխատանքների 10%-ն արդեն կատարվել է։ Վերջում տեսչական մարմինը կստուգի կատարած գործը, և եթե ամեն ինչ համապատասխանի պահանջներին, ապա շաբաթ օրը տոնավաճառը կվերաբացվի»,- ասել է Սամվել Ավետիսյանը։
