Նիկոլ Փաշինյանն ո՞վ է, որ Արցախը ճանաչի Ադրբեջանի կազմում։ Նա ի՞նչ իրավունք ունի Արցախի ժողովրդի անունից խոսելու, Արցախի ճակատագիրը որոշելու. ո՞վ է նրան այդ իրավունքը տվել։ Azg.am-ի թղթակցի հետ զրույցում նման հարցեր հնչեցրեց Արցախյան շարժման ակտիվիստ, հասարակական-քաղաքական գործիչ Բորիս Առուշանյանը՝ անդրադառնալով ՀՀ վարչապետի՝ երեկ արած այն հայտարարությանը, որ Ադրբեջանի 86 600 կմ/ք տարածքը ներառում է նաև Լեռնային Ղարաբաղը։
Բորիս Առուշանյանի խոսքով՝ Փաշինյանի հայտարարության վերաբերյալ Արցախի խորհրդարանի ընդունած երեկվա հայտարարությունը շատ մեղմ էր, պետք էր ավելի կոշտ դիրքորոշում հայտնել։
«Ադրբեջանի անկախության պահին Արցախն արդեն անկախ էր։ Ես դեռ չեմ խոսում 88 թվականի կայացրած բոլոր որոշումների մասին, որոնք համապատասխանում էին ԽՍՀՄ բոլոր օրենքներին։ Եթե անգամ վերցնենք միայն 1991 թվականի հռչակագիրը, որով Արցախը հռչակել է իր պետականությունը՝ Ադրբեջանի հետ զուգահեռ, պարզ է դառնում, որ Արցախն Ադրբեջանի տարածքային ամբողջականության հետ որևէ կապ չունի։
Հետևաբար, եթե անգամ Նիկոլն իր կողմից ճանաչում է Ադրբեջանի տարածքային ամբողջականությունը և այդ մասին բարձրաձայն հայտարարում, պետք է մի պահ հապավում կատարի և ասի, որ դա չի վերաբերում Արցախի Հանրապետությանը։ Նա պետք է անպայման այս հապավումն աներ, հայտարարեր, որ Արցախն, Ադրբեջանին զուգահեռ, ինքնորոշվել է դեռ 91 թվականին, բայց Նիկոլը դա չի ասում։ Միջազգային բոլոր խաղացողներն էլ, առիթից օգտվելով, անընդհատ ասում են, Նիկոլ Փաշինյանն Արցախը ճանաչում է Ադրբեջանի կազմում»,- ասաց Բորիս Առուշանյանը։
Մեր զրուցակիցն ընդգծեց՝ ՀՀ վարչապետն Արցախի վերաբերյալ իր հայտարարություններով աելի է սրում առանց այն էլ սրված իրավիճակը, թշնամանք հարուցում Հայաստանի և Արցախի իշխանությունների ու ժողովուրդների միջև։
«Այդ մարդն այդպես էլ չհասկացավ, որ իր քաղաքականությունը 100 տոկոսով հակահայկական է և հակասում է Արցախի և Հայաստանի շահերին։ Ինձ զարմացնում է նաև հայ ժողովրդի լռելյայն կեցվածքը։ Պրակտիկ քայլեր են պետք. Նիկոլ Փաշինայնին պետք է իշխանությունից հեռացնել։ Հայ ժողովուրդը պետք է ոտքի կանգնի, դրան շպրտի մի կողմ և իր ձեռքը վերցնի իշխանությունը։ Ուրիշ ձև չկա։ Մի՞թե հայ ժողովուրդը պոտենցիալ չունի։ Ունի, ուղղակի բարոյահոգեբանական ծանր, տրոհված վիճակում է գտնվում։
Ինչպե՞ս կարելի է նման մարդուն հանդուրժել, թողնել իշխանության ղեկին, երբ նա բացահայտ դավաճանում է հայ ժողովրդի, Հայաստանի ու Արցախի շահերին։ Սրա վերջը վատ է լինելու, որովհետև արցախցին չի համաձայնելու, պայքարելու է։ Արցախցին չի զիջելու։
Երկու ճանապարհ կա՝ կա՛մ պայքար, կա՛մ ցեղասպանություն։ Փաստորեն, Նիկոլը մեզ դնում է զոհասեղանին, հա՞։ Նման բան չի լինելու»,- ասաց Բորիս Առուշանյանը։
Հիշեցնենք, որ երեկ կայացած մամուլի ասուլիսի ժամանակ ՀՀ վարչապետ Նիկոլ Փաշինյանը հայտարարել էր՝ Ադրբեջանի 86 հազար 600 քառակուսի կիլոմետրը ներառում է նաև Լեռնային Ղարաբաղը։ Այս հայտարարությունը բուռն արձագանք էր գտել Հայաստանում և Արցախում։
