Հայաստանը վաղուց ՆԱՏՕ-ի գործընկեր է, և ես ողջունում ու դրական եմ գնահատունմ Ձեր ներդրումը ՆԱՏՕ-ի առաքելություններին և գործողություններին, այսօր ՀՀ վարչապետ Նիկոլ Փաշինյանի հետ համատեղ ասուլիսի ժամանակ հայտարարեց ՆԱՏՕ-ի գլխավոր քարտուղար Յենս Ստոլտենբերգը։
«Մոտ 20 տարի է՝ Հայաստանը ՆԱՏՕ-ի խաղաղապահ առաքելության կարևորագույն գործընկերներից է՝ օգնելով անվտանգ և և ապահով միջավայր ապահովել Կոսովոյում բնակվող բոլոր համայքնների համար։ Ես ողջունում եմ վերջին տարիներին հայ զինծառայողների մասնակցության ավելացումը»,- ասաց բարձրաստիճան պաշտոնյան։
Նրա տեղեկացմամբ՝ այսօրվա քննարկումների ընթացքում անդրադարձ է կատարվել նաև Հարավային Կովկասում կայունության կարևորությանը։
«Սա կարևոր է Եվրոատլանտյան անվտանգության համար, քանի որ մենք կանգնած ենք ավելի վտանգավոր աշխարհի առջև։
Այսօր Հայաստանն ու Ադրբեջանը հնարավորություն ունեն տարիների հակամարտությունից հետո տևական խաղաղության հասնել։ Ահա թե ինչու եմ ես երկու երկրներին կոչ անում համաձայնության հասնել, որն ուղի կհարթի հարաբերությունների կարգավորման և ձեր ժողովուրդների տևական խաղաղության համար»,- նշեց Յենս Ստոլտենբերգը։
ՆԱՏՕ-ի գլխավոր քարտուղարի խոսքով՝ կառույցն աջակցում է ՀՀ ինքնիշխանությանը, տարածքային ամբողջականությանը և Հայաստանի խաղաղ ձգտումներին։
Յենս Ստոլտեմբերգը միաժամանակ հայտարարեց՝ այսօր Նիկոլ Փաշինյանի հետ խոսել են նաև ՀՀ ներքին բարեփոխումների առաջընթացի մասին։
«Ես ողջունեցի այն փաստը, որ դուք աշխատում ենք ձեր Զինված ուժերի նկատմամբ ժողովրդավարական վերահսկողությունն ամրապնդելու ուղղությամբ, այդ թվում՝ նաև ՆԱՏՕ-ի բարեվարքության ամրապնդման ծրագրում ձեր մասնակցության միջոցով։
Դուք իրական հանձնառություն եք ցուցաբերել նաև կոռուպցիայի դեմ պայքարում՝ ժողովրդավարական ձեր ինստիտուտներն ուժեղացնելու և իրավունքի գերիշխանությունը պահպանելու հարցում»,- եզրափակեց ՆԱՏՕ-ի գլխավոր քարտուղարը՝ հույս հայտնելով, որ կողմերը կշարունակեն ուժեղացնել գործընկերությունը՝ միասին աշխատելով Հարավային Կովկասում և տարածաշրջանից դուրս ավելի մեծ խաղաղության, կայունության և բարեկեցության համար։
