Հայաստանի համար օդային տարանցիկ ճանապարհը փակելու Թուրքիայի քայլն ապացուցում է մի շարք իրողություններ. առաջինը, որ Հայաստանի նկատմամբ Թուրքիայի թշնամական քաղաքականությունը չի փոխվել, երկրորդ՝ Թուրքիան շարունակում է զգայուն մնալ մեր պատմական հիշողությանը, վրեժխնդրության գիտակցմանը և վերականգնվելու հնարավորությանը վերաբերող հարցերի նկատմամբ, Azg.am-ի թղթակցի հետ զրույցում ասաց թուրքագետ Ռուբեն Մելքոնյանը։
«Եվ ի վերջո, Թուրքիային ուղղակի պետք են պատրվակներ՝ իր թշնամական քաղաքականությունն իրականացնելու համար։
Հայաստանի առջև իր օդային սահմանը փակելը Թուրքիայի համար հերթական պատրվակն է, և այդ երկիրն ուղղակի կարող է նման հարյուրավոր պատրվակներ գտնել։ Ասենք՝ մյուս անգամ էլ Թուրքիան Հայաստանից կարող է պահանջել ապամոնտաժել Ծիծեռնակաբերդի հուշահամալիրը, որպեսզի բացի հայ-թուրքական սահմանը»,- ասաց մեր զրուցակիցը։
Անդրադառնալով Սևծովյան տնտեսական համագործակցության միջոցառման մասնակցության նպատակով ՀՀ ազգային ժողովի նախագահ Ալեն Սիմոնյանի մասնավոր ինքնաթիռի մուտքը Թուրքիա թույլ տալուն՝ Ռուբեն Մելքոնյանը նկատեց՝ որպես հյուրընկալող կողմ՝ Թուրքիան պարզապես չէր կարող արգելել Սիմոնյանի ինքնաթիռի մուտքը։
«Սա ոչ թե բարի կամքի դրսևորում է, այլ միջոցառումը հյուրընկալող կողմի պարտականություն»,- ասաց նա։
Վերջում թուրքագետը հավելեց՝ Երևան-Ստամբուլ չվերթները չարգելելն ամենևին չի նշանակում, որ Հայաստանի նկատմամբ Թուրքիայի թշնամական քաղաքականությունը դադարել է։
«Թուրքիայի թշնամական քաղաքականությունը դրսևորվում է Հայաստանի համար խնդիրներ ստեղծելով։ Եթե նա փակում է իր օդային սահմանը և Հայաստանի համար ստեղծում է խոչընդոտներ՝ այլ երկրներ թռիչքներ իրականացնելու համար, դա ընդգծված թշնամական քաղաքականության վառ դրսևորում է»,- ասաց Մելքոնյանը։
Հիշեցնենք, որ ավելի վաղ Թուրքիայի ավիացիոն իշխանություններն առանց նախօրոք տեղեկացնելու չեղարկել էին Flyone Armenia ավիաընկերությանը նախօրոք տրամադրված թույլտվությունը՝ Թուրքիայի օդային տարածքով դեպի Եվրոպա չվերթեր իրականացնելու համար։
Այսօր արդեն Թուրքիայի ԱԳ նախարար Մեւլութ Չավուշօղլուն հայտարարել է՝ իրենց համար անընդունելի է, որ Հայաստանում մեծարում են 1920-ականներին թուրքերին և ադրբեջանցիներին սպանողներին և Երևանում նրանց նվիրված հուշարձան տեղադրում։
«Միայն բացառության կարգով թույլատրել ենք Հայաստանի Ազգային ժողովի նախագահի օդանավի թռիչքը, քանի որ նա պետք է Սևծովյան տնտեսական համագործակցության միջոցառմանը մասնակցի։ Եթե Հայաստանը նման կերպ շարունակի, հուշարձանը չհանի, ապա լրացուցիչ քայլեր ենք ձեռնարկելու»,–ասել է Չավուշօղլուն։
