Հայ-ադրբեջանական սահմանի հայկական կողմում Եվրամիության քաղաքացիական առաքելության տեղակայումը բխում է Հայաստանի շահերից, Հայաստանը ցանկություն չունի երկիրը վերածել աշխարհաքաղաքական հակամարտությունների թատրոնի. հայտարարեց ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը՝ մեկնաբանելով ՌԴ ԱԳ նախարար Սերգեյ Լավրովի հայտարարությունները, թե Հայաստանում ԵՄ քաղաքացիական առաքելության տեղակայումը բազմաթիվ հարցեր է առաջացնում։
Անդրադառնալով Հայաստանում ԵՄ քաղաքացիական առաքելության տեղակայմանը՝ պատգամավորն ասաց, որ դա պայմանավորված է Հայաստանի կարիքներով։
2021 և 2022 թվականներին Հայաստանի ինքնիշխան տարածքը 3 անգամ ենթարկվել է Ադրբեջանի կողմից հարձակման։
«Եվ մենք, գնահատելով ԵՄ առաջին առաքելության երկամսյա գործունեությունը, պարզեցինք, որ այն որոշակի կայունացնող դեր ունի։ Իսկ դրա երկարաժամկետ գործունեությունը ՀՀ սահմանի երկայնքով կարող է նպաստել խաղաղության մթնոլորտի ստեղծմանը և անվտանգության լրացուցիչ երաշխիք դառնալ»,- ասաց Խանդանյանը։
