Կիպրոսն այն շատ փոքրաթիվ երկրներից է, որին անվերապահորեն կարելի է համարել Հայաստանի բարեկամը, և նույնիսկ Նիկոլ Փաշինյանը դեռևս չի կարողացել փչացնել երկու պետությունների հարաբերությունները։ Սական ռազմական փորձագետ Կարեն Վրթանեսյանը խիստ թերահավատ է, որ ՀՀ գործող իշխանությունների օրոք բանակի ուժեղացում կամ որևէ երկրի հետ ռազմատեխնիկական լուրջ համագործակցություն կարող է ծավալվել։
«Այս իշխանություններն, ըստ էության, սպասարկում են թուրք-ադրբեջանական շահերը, և չեմ հավատում, որ հնարավոր լինի Հայաստանի համար որևէ արդյունավետ փոխգործակցություն կամ դաշնակցություն իրագործել։ Կներեք, բայց ինձ համար դժվար է նման բանի հավատալ։
Իհարկե, Կիպրոսի հետ ռազմատեխնիկական հաջող համագործակցության հեռանկար կա, բայց ոչ՝ այս իշխանությունների դեպքում, և ես չեմ զարմանա, եթե մեկ-երկու տարի անց իմանանք՝ նույն այդ հարաբերություններն ինչպես են սաբոտաժ արել որևէ այլ մակարդակում»,- ասաց ռազմական փորձագետը։
Կարեն Վրթանեսյանը միաժամանակ հավելեց՝ ՀՀ պետական համակարգում կան անհատներ, որոնք համոզված են և իսկապես վստահություն ունեն, որ ծառայում են Հայաստանի Հանրապետությանը։ Այդ մարդիկ փորձում են ինչ-որ բան անել, բայց վերջում՝ որևէ այլ օղակում, արդյունավետ բոլոր համագործակցությունները չեզոքացվում են։
Հիշեցնենք, որ այսօր մեկնարկել է ՀՀ պաշտպանության նախարար Սուրեն Պապիկյանի պաշտոնական այցը Կիպրոսի Հանրապետություն։ Տեղի է ունեցել ՀՀ պաշտպանության նախարար Սուրեն Պապիկյանի և Կիպրոսի Հանրապետության պաշտպանության նախարար Միխալիս Յորղալասի առանձնազրույցը, որին հաջորդել է ընդլայնված կազմով հանդիպում:
Հանդիպման ընթացքում քննարկվել են պաշտպանության բնագավառում հայ-կիպրական համագործակցությանն առնչվող մի շարք հարցեր:
Կողմերն ամփոփել են համագործակցության ներկայիս ընթացքն ու նախանշել դրա զարգացման նոր հնարավորությունները` պատրաստակամություն հայտնելով գործակցել ավելի ընդգրկուն օրակարգով՝ ուսումնավարժական ծրագրեր, փորձի փոխանակում տարբեր ոլորտներում, ռազմատեխնիկական համագործակցություն և փոխադարձ հետաքրքրություն ներկայացնող այլ հարցեր:
