Հասկանալի է, որ պաշտոնական Երևանի՝ սպառազինություն ձեռք բերելու այլընտրանքային տարբերակների ֆոնին Հայաստանը և Ֆրանսիան զարգացնում են ռազմատեխնիկական համագործակցության ոլորտը. զենքի մատակարարման այն հնարավորությունները, որ Հայաստանը պատմականորեն ուներ Ռուսաստանից, ուկրաինական հակամարտության պայմաններում լուրջ դժվարությունների են հանդիպում։ Azg.am-ի թղթակցի հետ զրույցում նման տեսակետ հայտնեց քաղաքագետ Դավիթ Հարությունովը։
«Ֆրանսիայի հետ ռազմական ոլորտի համագործակցությանը զուգահեռ՝ ընթանում է նաև քաղաքական ոլորտում համագործակցությունը։ Երևանը փորձում է ինչ-որ կերպ բալանսավորել տարածաշրջանում անբարենպաստ ուժերի հարաբերակցությունը և Ֆրանսիայի միջոցով դուրս գալ մեկուսացումից, որովհետև տեսնում ենք, որ Թուրքիան և Ադրբեջանը միասնական դիրքորոշում ունեն, մինչդեռ ՀՀ դաշնակից Ռուսաստանը մանևրում է, ինչպես որ մանևրում է Իրանը»,- ասաց քաղաքագետը։
Դավիթ Հարությունովի խոսքով՝ փորձ է արվում Ֆրանսիային բերել Հայաստանի համար բարենպաստ իրադրության դաշտ։ Բացի դրանից՝ այն միջոցառումների շարքում, որ Երևանն իրականացնում է Արևմուտքի հետ հարաբերություններն ակտիվացնելու ուղղությամբ, Ֆրանսիան հանդես է գալիս որպես դիվանագիտական խողովակ։
«Ֆրանսիան Հայաստանի հետ նախկինում էլ պատմականորեն բարձր մակարդակի հարաբերություններ է ունեցել, քան արևմտյան մյուս երկրները, և այդ կապերը հիմա էլ օգտագործվում են՝ զարգացնելու երկկողմ հարաբերությունները։
Իհարկե, Ֆրանսիան այստեղ ունի շահեր. փորձ է արվում Հայաստանի միջոցով տարածաշրջանում ամրապնդելու Փարիզի դիրքերը և ապահովվելու Ֆրանսիայի ներկայությունը։
Այս մոդելը Ֆրանսիան նախկինում կիրառել է նաև Մերձավոր Արևելքում, Հյուսիսային Աֆրիկայում և այլն. եղել է կոնկրետ երկիր, որի հետ Ֆրանսիան պատմական կապեր է ունեցել, և որի վրա հենվելով՝ Փարիզը փորձել է տարածաշրջանում ակտիվ լինել»,- ասաց մեր զրուցակիցը։
Քաղաքագետը միաժամանակ շեշտեց՝ Փարիզի ակտիվությունը, բացի բուն ֆրանսիական շահերից, ինտեգրված է Արևմուտքի առավել գլոբալ միջոցառումների մեջ, որոնք նպատակ ունեն տարածաշրջանում թուլացնելու Ռուսաստանի ազդեցությունը։
«Այն, որ Ֆրանսիան աջակցում է Հայաստանին, դրական է, բայց մյուս կողմից պետք է իրատեսական կերպով գնահատել այդ աջակցությունը և շատ մեծ ակնկալիքներ չունենալ։ Ֆրանսիայի ակտիվությունը դեռ որ այդքան էլ էֆեկտիվ չէ, քանի որ նա դեռ չի կարողացել ինչ-որ կերպ նեյտրալիզացնել Ադրբեջանի կողմից եկող ռազմական վտանգը։ Մյուս կողմից Ադրբեջանը շատ արագ դուրս է գալիս բոլոր այն ֆորմատներից, որոնց մասնակցում է Ֆրանսիան»,- նշեց Դավիթ Հարությունովը՝ միաժամանակ շեշտելով, որ Ադրբեջանի դիրքորոշումը որևէ կերպ չի կարող ազդել Փարիզի վրա՝ դադարեցնելու Հայաստանին զինտեխնիկայի մատակարարումը։
«Կարծում եմ՝ Ադրբեջանի արձագանքը ոչ այնքան Փարիզի դեմ է, որքան Հայաստանի։ 2020 թվականից հետո Ադրբեջանը հետևողական քաղաքականություն է իրականացնում՝ խանգարելու Հայաստանին զենք գնել։ Սա նպատակ ունի սահմանափակել ՀՀ սուվերենությունը, այսինքն՝ Բաքուն ի սկզբանե խնդիր է դնում, որ Հայաստանն իրավունք չունի զենք գնել, և դա այն պայմաններում, երբ վերջին երկու տասնամյակում Ադրբեջանը տարածաշրջանի ամենառազմականացված պետությունն է»,-ամփոփեց քաղաքագետը։
Հիշեցնենք, որ X սոցիալական ցանցում տարածվել են վրացական Փոթի նավահանգստից արտահոսած լուսանկարներն ու տեսանյութերը, որոնք ցույց են տալիս, որ ավելի քան 20 ֆրանսիական ACMAT Bastion զրահամեքենաներ են բեռնաթափվում։ Դրանք, ենթադրաբար, պետք է փոխադրվեն Հայաստան։
