Ադրբեջանը միշտ էլ հայկական դիրքերի ուղղությամբ հարձակումներ է սկսում՝ նախապես տեղեկատվական ֆոն ստեղծելով, իսկ հետո մեղքը բարդում մեզ վրա։ Դա քարոզչական տեղեկատվական հնարք է, որը միշտ օգտագործում թշնամին։ Նույնը վերաբերում է, իբր, ականներ տեղափոխելու ու տեղադրելու մասին նրանց տարածած կեղծ լուրերին։ Այսինքն՝ պետք է նկատի ունենալ, որ եթե Ադրբեջանը հիմա էլ նման ապատեղեկատվություն է տարածում, ուրեմն էլի պատրաստվում է ինչ-որ սադրանքի։ Այդ մասին «Փաստինֆո»-ի հետ զրույցում ասաց Արցախի ԱԺ ՀՅԴ խմբակցության ղեկավար Արթուր Մոսիյանը՝ մեկնաբանելով Ադրբեջանի ԱԳՆ հաղորդագրությունը, ըստ որի, իբր, Լաչինի միջանցքով հայկական արտադրության ականներ են տեղափոխվել։
«Արցախի հետ կապված Ալիևի հայտարարություններին, ցավոք, ՀՀ օրվա իշխանությունները չեն արձագանքում։ Ալիևը ցինիկաբար հայտարարում է, թե չի պատրաստվում Արցախի հարցը որևէ մեկի հետ քննարկել, Փաշինյանի վարչախումբն էլ քար լռություն է պահպանում։ Սա նշանակում է՝ կա՛մ Արցախի հարցի հետ կապված Ալիևն ու Փաշինյանը նույն տեսակետն ունեն, կա՛մ պարտված Նիկոլ Փաշինյանն այլ կերպ չի կարողանում արձագանքել։ Երկուսն էլ մեկը մյուսից վատ տարբերակներ են»,-ասում է Մոսիյանը։
Ցավով արձանագրելով, որ Արցախի հարցը, փաստացի, մղվել է երկրորդ պլան, Արցախի ԱԺ պատգամավորը նկատում է՝ վաղն, անխուսափելիորեն, երկրորդ պլան է մղվելու Սյունիքի հարցը, մյուս օրը՝ Վարդենիսի, Ջերմուկի, հետո էլ՝ Երևանի հարցը։
Արցախը Հայաստանին կապող միջանցքում անցակետ տեղադրելու՝ թշնամու սպառնալիքների ֆոնին այդ երկրի ԱԳՆ հաղորդագրությունը Մոսիյանը պատահական չի համարում։
«Մեր ժողովրդի հանդեպ տեղեկատվական դիվերսիա է իրականացվում։ Չկա առանձին Արցախի, Սյունիքի, Մարտակետի, Ստեփանակերտի հարց։ Մենք մի պարզ ճշմարտություն պետք է հասկանանք. դրանք բոլորը հայկական հողեր են։ Եթե մտածում են, թե Արցախը մատաղ անելով՝ փրկելու են 29.800 քառ. կմ-ը, չարաչար սխալվում են։ Թշնամին ունի իր դավադիր ծրագիրը, որին դավադրությամբ կամ անկարողությամբ աջակցում է ՀՀ օրվա իշխանությունը»։
