Ձերբակալելով ՀՀԿ փոխնախագահ Արմեն Աշոտյանին՝ իշխանությունները նպատակ ունեն մեկուսացնել և լռեցնել նրան, բայց թող չմտածեն, թե նման գործողություններով կարող են ահաբեկել Արմեն Աշոտյան քաղաքական գործչին։ Նրա ձերբակալությունը միանշանակ քաղաքական գործընթաց է, քաղաքական հետապնդում, Azg.am-ի թղթակցի հետ զրույցում ասաց ՀՀԿ նախկին պատգամավոր, իրավաբան Հովհաննես Սահակյանը։
«Եթե նայենք պաշտոնական տեղեկատվությանը, ապա Արմեն Աշոտյանը ձերբակալվել է խափանման միջոցի պայմանի խախտման համար։ Բայց նա վստահաբար այն անձը և քաղաքական գործիչը չէ, որ միտումնավոր գնա պայմանների խախտման։
Ընդդիմադիր քաղաքական ուժի փոխնախագահի ձերբակալությունը ցուցիչ է ամբողջ հանրությա համար, առավել ևս, որ Արմեն Աշոտյանը միայն հարցազրույցներ տվող քաղաքական գործիչ չէ, այլ շատ սերտ համագործակցում է միջազգային կառույցների հետ, այլընտրանքային կարծիք ներկայացնում Հայաստանից։
Այս ամենը հաշվի առնելով՝ բնական է, որ ՀՀԿ փոխնախագահն իշխանությունների կոկորդին կանգնած ոսկոր է, և նրա նկատմամբ պետք է որոշակի պրոցեսներ տանեին»,- ասաց Հովհաննես Սահակյանը։
Նրա խոսքով՝ այսօր Հայաստանում այնպիսի պրոցեսներ են ընթանում, որ դժվար է «իրավաբանություն», «իրավունք» կամ «արդարադատություն» եզրույթների հետ որևէ աղերս չունեն։
Հիշեցնենք, որ փաստաբան Տիգրան Աթանեսյանն ավելի վաղ հայտնել էր՝ ձերբակալել են ՀՀԿ փոխնախագահ Արմեն Աշոտյանին։
Ավելի ուշ հայտնի էր դարձել, որ ՀՀԿ փոխնախագահ Արմեն Աշոտյանը ձերբակալվել է Քննչական կոմիտեի հատկապես կարևոր գործերի քննության գլխավոր վարչությունում քննվող՝ «Երևանի Մխիթար Հերացու անվան պետական բժշկական համալսարան» հիմնադրամում կատարված առերևույթ չարաշահումներին վերաբերող քրեական վարույթի շրջանակներում, հիմքը խափանման միջոցի պայմանները խախտելն է եղել։
