«Ազգային անվտանգության մարմիններում ծառայության մասին» օրենքում լրացում կատարելու մասին օրենքի նախագծով առաջարկվում է իրավական հիմքեր ստեղծել ԼՂ ԱԱԾ նախկին աշխատակիցներին ՀՀ ԱԱԾ-ում համապատասխան պաշտոնների նշանակելու համար։ Ազգային ժողովի պաշտպանության և անվտանգության հարցերի մշտական հանձնաժողովի նիստի ընթացքում այս մասին ասաց ԱԱԾ տնօրենի տեղակալ Անդրանիկ Սիմոնյանը։
Ըստ պաշտոնյայի՝ նախագծի ընդունումը վերջիններիս սոցիալական և աշխատանքային իրավունքների իրացման համամար լրացուցիչ երաշխիքներ կստեղծի, քանի որ Լեռնային Ղարաբաղի ԱԱԾ նախկին բազմաթիվ աշխատակիցներ ցանկություն են հայտնել աշխատանքի անցնել ՀՀ ԱԱԾ-ում՝ ՀՀ քաղաքացիություն ստանալու պարագայում։
«Օրենքի լրացմամբ սահմանում ենք կատեգորիա, որն է՝ 2023 թվ. սեպտեմբերի 19-ի դրությմաբ ԼՂ ԱԱԾ-ում պաշտոն զբաղեցրած լինելը։ Մենք ունենք բոլոր գործիքակազմերը՝ պարզելու, թե կամայական որևէ դիմորդ այդ օրվա դրությամբ բոլոր պահանջները բավարարե՞լ է, թե ոչ»,- ասաց Անդրանիկ Սիմոնյանը։
Նիստին ներկա ընդդիմադիր պատգամավոր Գեղամ Մանուկյանը թեմայից դուրս հետաքրքրվեց՝ Կիրանցում անցկացված փշալարերից 15 մետր հեռավորության վրա կա բնակելի տուն, որը, ըստ ՀՀ օրենքի, դիտվում է սահմանային շերտում գտնվող կառույց։
«Ո՞նց եք պատրաստվում կանոնակարգել բոլոր սահմանային ռեժիմները, որպեսզի Կիրանցի բնակիչների կենսագործունեությունը չխաթարվի, որովհետև համաձայն այս օրենքի արգելքի՝ Կիրանցի վերոնշյալ տան բնակիչը սեփական հարկի տակ որևէ առիթի ժամանակ չի կարողանալու ոգելից խմիչք օգտագործել կամ եթե որոշի այդ տարածքում 24-ժամյա խանութ բացել, օրենքն արգելելու է նման գործունեությունը»,- ասաց պատգամավորը։
ԱԱԾ տնօրենի տեղակալը նշեց, որ չի կարող հնչած հարցին խորքային պատասխան տալ և Գեղամ Մանուկյանին խորհուրդ տվեց հարցը գրավոր ուղարկել։
Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն իր հերթին հավելեց, որ թափուր պաշտոններ մնալու պարագայում դիմելու և աշխատանքի անցնելու հնարավորություն ունեն նաև ԼՂ զինված ուժերի, ՆԳՆ, պետական պահպանության ծառայության աշխատակիցները։
«Մեծ փորձառություն ունեցող, Արցախում ծառայություն անցած ԱԱԾ աշխատակիցները հնարավորություն ունեն լրացնելու մեր ուժային կառույցի հանմապատասխան ստորաբաժանումները, և դրանով մենք կունենանք շատ արժեքավոր համալրում»,- ասաց Անդրանիկ Քոչարյանը։
Իշխանական պատգամավոր Վիլեն Գաբրիելյանն էլ ԱԱԾ տնօրենի տեղակալից հետաքրքրվեց՝ ԼՂ ազգային անվտանգության ծառայության կողմից ի՞նչ միջոցներ են ձեռնարկվել՝ ապահովելու Արցախի բարձրաստիճան պաշտոնյաների՝ Բակո Սահակյանի, Արկադի Ղուկասյանի, Արայիկ Հարությունյանի անվտանգությունը, որտե՞ղ է վերջիններիս թիկնազորը, ինչո՞ւ չի կանխվել Դավիթ Բաբայանի՝ որպես պետական գաղտնիքի կրողի փոխանցումը Ադրբեջանին, օպերատիվ հաշվառման նյութերը ոչնչացվե՞լ, թե տեղափոսխվել են Հայաստան, ԼՂ ԱԱԾ անձնակազմը ե՞րբ է լքել Արցախի տարածքը, եղել է արդյոք էվակուացիոն պլան։
ԱԱԾ տնօրենի տեղակալ Անդրանիկ Սիմոնյանն այս հարցերը, սակայն, անպատասխան թողեց։
