Աշխարհը Հայաստանին պետք է ճանաչի ոչ թե Սնուփ Դոգի՝ այստեղ համերգ տալով, այլ հազարամյա մշակույթով, Հայաստանի՝ պրոակտիվ ներքին և արտաքին քաղաքականությամբ, տարածաշրջանային գործոն լինելու հանգամանքով։ Azg.am-ի թղթակցի հետ զրույցում նման տեսակետ հայտնեց քաղտեխնոլոգ Արմեն Բադալյանը՝ անդրադառնալով Նիկոլ Փաշինյանի այն հայտարարությանը, որ Սնուփ Դոգի մասշտաբի աստղերի համերգը նպաստում է, որ Հայաստանի անունը շրջանառվի աշխարհում, որպեսզի որևէ մեկը չմտածի, թե Հայաստանը կոտրվել և ծնկի է եկել։
Քաղտեխնոլոգի խոսքով՝ աշխարհին ճանաչելի դառնալու համար Հայաստանը պետք է իրենից հզոր քաղաքական, տնտեսական, ռազմական և մշակութային գործոն ներկայացնի։
«Չնայած հիմա էլ աշխարհը Հայաստանին ճանաչում է արցախյան հիմնախնդրով, բայց իրապես կճանաչի, եթե տարբեր բնագավառներում մեր երկիրը լուրջ կշիռ ունենա։ Բայց եթե երկիրը կշիռ չի ունենում, այդ երկրի ղեկավարությունը սկսում է մանիպուլյացիաների դիմել։ Մանիպուլյացիան այս դեպքում Սնուփ Դոգին Հայաստան հրավիրելն է, որպեսզի նա գա, մեկ ժամ երգի և գնա։ Աշխարհը դրանով կիմանա, որ Հայաստան անունով երկիր կա, որտեղ մարդիկ ռեփերի համերգի ժամանակ երգում-պարում-ուրախանում են։ Սա, իհարկե, լուրջ չէ»,- ասաց Արմեն Բադալյանը։
Քաղտեխնոլոգի խոսքով՝ ամենահատկանշականն այն է, որ Սնուփ Դոգի երևանյան համերգով պարծենում է ոչ թե պատահական մեկը, այլ երկրի առաջին դեմքը, որն ամենաշատը պետք է շահագրգռված լիներ Հայաստանը տարբեր բնագավառներում գործոն դարձնելու գործում։
«Բայց Նիկոլ Փաշինյանը Հայաստանը գործոն չի դարձնելու, քանի որ իշխող քաղաքական թիմին նշանակել են կոնկրետ խնդիրներ լուծելու համար՝ Արցախը թողնելու Ադրբեջանի կազմում, Հայաստանից դուրս բերելու ռուսական զորքը, Հայաստանն առհասարակ դուրս բերելու ռուսական ազդեցության գոտուց և Ադրբեջանին տալու «Զանգեզուրի միջանցքը»։ Ահա այս երեք գործոնի համար են նրանք նշանակված, և բնական է, որ նման իշխանությունը չի կարող Հայաստանը զարգացնել և առաջ մղել։ Փոխարենը մանիպուլյացիոն տեխնոլոգիաներ կիրառելով՝ նշում են, թե Հայաստանը պետք է գործոն դառնա ինչ-որ ամերիկացի ռեփերի՝ այստեղ համերգ տալով»,- ամփոփեցԱրմեն Բադալյանը։
Հիշեցնենք, որ ՔՊ-ի նախընտրական հանրահավաքին Նիկոլ Փաշինյանը պատասխանել էր այն հարցին, թե ինչու է կառավարությունը 6 միլիոն դոլար հատկացնում Սնուփ Դոգի երևանյան համերգի կազմակերպման համար։
«Մենք ասում ենք՝ մենք 3 000 տարվա ժողովուրդ ենք, 3 000 տարվա պետություն ենք։ Իսկ որևէ մեկը վիճակագրություն արե՞լ է՝ «Հայաստան» բառը աշխարհի բնակչության քանի՞ տոկոսը գիտի։ Եվ այո, այդ թվում՝ դրա համար ենք անում։ Երբ որ նման մասշտաբի աստղերի համերգ է տեղի ունենում Հայաստանում, Հայաստան անունը շրջանառվում է աշխարհում, երիտասարդության շրջանում, սոցիալական ցանցերում։ Մենք դա անում ենք Հայաստան անվան համար, որ որևէ մեկը չմտածի, թե Հայաստանը չկա, որ որևէ մեկը չմտածի, թե Հայաստանը կոտրվել է, թե Հայաստանը ծնկի է եկել»,- ասել էր Փաշինյանը։
