1994 թվականից ի վեր՝ Ադրբեջանն արհամարհել է իր ստանձնած բոլոր պարտավորությունները, էլ չասած, որ գտել է իշխանություն, ում փորձում է ամեն գնով պահել՝ չնայած ինքն էլ կապիտուլյանտ է անվանում։ Այնպես որ, պարտված իշխանությունները միայն նոր պարտություններ են բերելու, Azg.am-ի թղթակցի հետ զրույցում ասաց վերլուծաբան Թևան Պողոսյանը՝ անդրադառնալով Բերձոր-Ստեփանակերտ ճանապարհի սկզբնամասում Ադրբեջանի դրոշ բարձրացնելու փաստին։
«Դեռ երկու տարի առաջ մեկ անգամ չէ, որ ասել եմ՝ Ադրբեջանն անելու է հետևյալ քայլերը. այն րոպեից, երբ դելիմիտացիա և դեմարկացիա իրականացվի կամ խաղաղության պայմանագիր ստորագրվի, Ադրբեջանն ասելու է՝ ի՞նչ գործ ունեն ձեր անձնագրերը, դրամը, կրթական համակարգը և մնացած մյուս բաներն իմ տարածքում։ Բոլոր այդ քայլերն այսօր նրա կողմից կյանքի են կոչվում»,- ասաց մեր զրուցակիցը։
Թևան Պողոսյանի համոզմամբ՝ միակ ուժը, որը կարող է իրավիճակ փոխել, ՀՀ զինված ուժերը և Արցախի պաշտպանության բանակն են։
«Այն օրը, երբ կունենանք այդ որոշումն ընդունող հրամանատարություն, Ադրբեջանին պարտավորեցնող միջազգային փաստաթղթերը կյանքի կկոչվեն։ Դրանից առաջ Հաագայի դատարանը թեկուզ տասը որոշում ընդունի, ոչինչ չի փոխվելու։
Իհարկե, Արդարադատության միջազգային դատարան դիմող հայաստանյան թիմը և անձամբ Եղիշե Կիրակոսյանը սրտանց կատարում են իրենց ձեռքից եկածը՝բրավո և շնորհակալություն նրանց, բայց չէ՞ որ երբ որոշում է ստացվում, այն պետք է կյանքի կոչվի։
Սրանից հետո միայն մեկ լուծում է մնացել՝ 1992 թվականի լուծումը։
Կրկնում եմ՝ այլևս ոչ մի անգամ ոչ մի ուժ Ադրբեջանին այդ կետից չի հանելու՝ բացի ԱՀ պաշտպանության բանակից և ՀՀ զինված ուժերից։ Վերջ՝ միայն այդ սցենարն է մնացել։ Որքան շուտ մտածենք այդ սցենարը կյաքի կոչելու, այնքան ավելի լավ։
Վերջին երկու տարում մենք բանակն պետք է այնքան հզորացնեինք, որ այս օրը չհասունանար, Ադրբեջանի մտքով էլ չանցներ գնալ նման քայլերի»,- ասաց վերլուծաբանը։
Հիշեցնենք, որ Ադրբեջանի պետական սահմանային ծառայությունը հայտարարել է Հայաստանի հետ սահմանի նոր սահմանային անցակետում «երկրի դրոշի բարձրացման արարողության մասին»։
Հայաստանն իր հերթին Հակարիի կամրջին Ադրբեջանի կողմից անցակետ տեղադրելու հարցով դիմել է Հաագայի դատարան։
