Ժողովուրդն ինչ որ խնդրել է, այն էլ «Տավուշը հանուն հայրենիքի» շարժումն անում է։ Սա ժողովրդավարության կանոնն է. շարժումն ականջալուր է լինում մարդկանց պահանջներին, և Բագրատ սրբազանը մինչև առաջիկա մեծ հանրահավաքը պատրաստակամ հանդիպումներ է ունենում տարբեր շրջանակների հետ։ Azg.am-ի թղթակցի հետ զրույցում նման տեսակետ հայտնեց վերլուծաբան Թևան Պողոսյանը՝ հասարակությանը կոչ անելով անպայման մասնակցել կիրակի օրը Հանրապետության հրապարակում կայանալիք հանրահավաքին։
Մեր զրուցակիցն էական համարեց, որ այդ հանդիպումների մասնակիցներից որևէ մեկը բողոք կամ դժգոհություն չի արտահայտում, այլ համերաշխ կերպով սպասում է իրենց կողմից առաջադրված հարցերի պատասխաններին։
«Բագրատ սրբազանն ասում է, որ այս գործընթացը հաշտության և միավորման մասին է, բայց այդ միավորումը, հասկանալի է, օդից չի լինելու. գնում է գործընթաց, և այդ գործընթացի արդյունքում խոսք են տվել, որ մայիսի 26-ին կհայտարարեն այսինչ-այսինչ բաները։
Պարզապես ամբողջ խնդիրը հետևյալն է. մի կողմից ինչ-որ պահանջ ենք դնում, բայց երբ մեզ ասում են, որ այդ պահանջը կկատարեն, սկսում ենք դրա դեմ քննարկումները։ Անընդհատ լսում ենք, որ որոշ շրջանակներ Բագրատ սրբազանին ասում են՝ «Վարչապետի ձեր թեկնածուին ասեք»։ Հիմա մարդիկ պատրաստ են ասել, բայց մենք արդեն կասկածի տա՞կ ենք դնում։ Կասեն, կներկայացնեն. ամեն ինչ իր հունով է գնում»,- վստահություն հայտնեց Թևան Պողոսյանը։
Վերլուծաբանը հիշեցրեց՝ Բագրատ սրբազանի ամենակարևոր հայտարարություններից մեկը համբերությամբ զինվելն է և դեպի թիրախը շարժվելը, ինչն էլ այսօր արվում է։
«Մեր երկրում ռազմավարական հաղորդակցություն տեղի չի ունեցել. դա բոլոր կառավարությունների ամենամեծ բացթողումն ու սխալն է եղել»,- ասաց մեր զրուցակիցը։
Անդրադառնալով ԱՄՆ կենտրոնական հետախուզական վարչության ղեկավարի տեղակալ Դեյվիդ Քոհենի երևանյան այցին՝ Թևան Պողոսյանը շեշտեց՝ ամերիկացի բարձրաստիճան պաշտոնյան հենց այնպես չէր կարող Հայաստան գալ. ակնհայտ է՝ կան ամերիկյան շահեր, որոնց առաջմղման համար ամերիկյան կառավարությունը ջանքեր է ներդնում։
«Եթե իրենց շահերի բավարարման համար գործընթացներ պետք է արվեն՝ արվում են։ Թե՛ դա ցույցերի համար է, թե՛ կապված է Իրանում օրեր առաջ տեղի ունեցած ողբերգական դեպքերի հետ, չգիտեմ, բայց նշանակում է, որ այստեղ ամերիկյան շահեր են իրագործվում։
ՀՀ կառավարությունը ևս, եթե ինչ-որ պաշտոնյայի է ընդունում, իր հերթին պետք է առաջնորդվի հայկական շահերով։ Բայց արդյոք մենք մեր շահերի մասին խոսել ենք։ Օրինակ՝ ինչպե՞ս պետք է ազատենք Բաքվի բանտերում պահվող հայ ռազմագերիներն, Արցախի բարձրաստիճան պաշտոնյաներին, ինչպե՞ս պետք է ապահովենք արցախահայերի վերադարձի իրավունքը։
Բոլոր այս հարցրն ամերիկացի բարձրաստիճան պաշտոնյայաի հետ քննարկվե՞լ են, թե ոչ։ Եթե հայկական կողմն այս հարցերը չի քննարկել՝ օգտագործելով պատեհ առիթը, շատ վատ է»,- ամփոփեց Թևան Պողոսյանը։
