Պոտենցիալը միշտ եղել է, բայց մենք ինքներս, քննադատելով գործող իշխանություններին, շատ ժամանակ միամտաբար հայտնվել ենք նրանց օրակարգում՝ ոչ մի անգամ չձևավորելով մեր սեփական օրակարգը, Azg.am-ի թղթակցի հետ զրույցում ասաց Արցախի Հանրապետության ԱԺ «Արդարություն» խմբակցության պատգամավոր Մետաքսե Հակոբյանը՝ անդրադառնալով ԱՀ նախկին նախագահ Աշոտ Ղուլյանի այն տեսակետին, որ ունենք նորից մեզ վերագտնելու և ազատագրական պայքարի նոր փուլ սկսելու համար անհրաժեշտ պոտենցիալը։
Մեր զրուցակցի խոսքով՝ այժմ մի այնպիսի ժամանակաշրջանում ենք, երբ տեղի է ունեցել սարսափելին, բայց ոչ՝ անդառնալին, և ինքը վերջին ամիսներին անկհայտորեն տեսնում է, որ հասարակության մոտ փոքր առ փոքր հասունանում է իրավիճակը ճեղքելու գիտակցումը։
«Այդ գիտակցումը տեսնում եմ ոչ միայն արցախահայերի, այլև՝ ամբողջ հայության մոտ։ Հայրենիք կորցնելու ներքին ընդվզումն ակնհայտ է, այն կեղեքում է մարդկանց, և նրանք չգիտեն՝ ինչպես դա արտահայտել, ինչ անել։
Մյուս կողմից պետք է ազնիվ լինենք ժողովրդի հետ, որ չունենք քաղաքական գործիչ կամ թիմ, որը հանրության անվերապահ աջակցությունը կունենա։ Միակ խնդիրը, կարծում եմ, դրանում է։ Այստեղ մեղավորությունը կրկին բոլորինս է։ Մենք ընդունել ենք դրված ջրբաժանները և անցել սևերի կողմը, ինչն ամենասխալն է եղել»,- նշեց Մետաքսե Հակոբյանը։
Արցախցի պատգամավորը շեշտեց՝ պետք է վերաիմաստավորել և վերարժևորել ազգային արժեքները՝ համոզվելու, որ ընդվզման պոտենցիալ իսկապես կա։
«Այսօրվա ԱԺ հանդիսավոր նիստում մտերմիկ զրույցներ ունեցանք 88-ի ակունքներում գտնվող և հաղթանակի սկիզբը դրած մարդկանց հետ։ Նրանք ասացին, որ 1985-ին, երբ իրենք սկսում էին պրոցեսը, չունեին ժողովրդի աջակցությունը. առաջամարտիկները, քաղաքական վերնախավը ձևավորվել են հնեց շարժման ընթացքում։
Այնպես որ, կարծում եմ՝ մենք նոր զարթոնքի մեկնարկը տվել ենք։ Ես չեմ խոստանում, որ դա հեշտ կամ արագ է լինելու, բայց կարևորը չհուսահատվելն է։
Թվում էր, որ պետք է ձեռքներս ծալեինք, համակերպվեինք կատարվածի հետ և վշտի մեջ մնայինք, բայց այդպես չէ։ Դա մեր հակառակորդների ուզածը կլիներ։ Մենք այդպես չենք վարվելու, ամեն ինչ անելու ենք, որ Արցախը վերադարձնենք հային. սա ասում եմ առանց պաթոսի, քանի որ այս միտքն իմ կարգախոսն է դարձել»,- ամփոփեց Մետաքսե Հակոբյանը՝ հավելելով, որ մեր նպատակը պետք է լինի ոչ թե արցախահայերի՝ Արցախ վերադարձը, այլ որ Արցախը վերադառնա իրական տերերին՝ հայերին։
Հիշեցնենք, որ Արցախի Հանրապետության Ազգային ժողովի նախկին նախագահ Աշոտ Ղուլյանն այսօր հայտարարել էր՝ ուզում է շնորհավորել բոլոր նրանց, ովքեր հավատում են, որ հայ ժողովուրդը փառահեղ ճանապարհ է անցել և ունի պոտենցիալ՝ նորից մեզ վերագտնելու և ազատագրական պայքարի նոր փուլ սկսելու համար։
Հարցին՝ արցախցիների վերադարձն Արցախ ի՞նչ ճանապարհով է տեսնում, և ինչ պետք է անել դրա համար, նախկին պաշտոնյան պատասխանել էր. «Բոլոր հնարավոր ճանապարհներով։ Ամեն ինչ պետք է օգտագործել»։
