Ադրբեջանցի դիվերսանտների կողմից արցախցի երեք ոստիկանի սպանությունը ոչ թե ահաբեկչություն է, այլ պատերազմի շարունակություն։ Բլոկադան ինքը պատերազմի էլեմենտ է, հետևաբար այս ամենը՝ պատերազմի մեկ այլ տակտիկա, Azg.am-ի թղթակցի հետ զրույցում ասաց Արցախյան շարժման ակտիվիստ, հասարակական-քաղաքական գործիչ Բորիս Առուշանյանը։
Նրա խոսքով՝ ինքը դեռ 1991 թվականից է ասում և այսօր էլ պնդում է, որ թուրք-ադրբեջանական տանդեմը Հայաստանին և Արցախին հանգիստ չեն տալու այնքան ժամանակ, քանի դեռ հայկական կողմը զարգանալու և հզորանալու հնարավորություն ունի։
«Նրանք ցանկանում են այնպիսի վիճակում դնել Հայաստանին, որ նա օր օրի կտրվի արտաքին աշխարհից, զարգանալու հնարավորություն չունենա և գոյատևելու ողորմություն խնդրի թուրքերից։ Միայն այդ դեպքում նրանք հանգիստ կթողնեն հայ ժողովրդին։
Նույնն այսօր կարելի է պրոյեկտել Արցախի վրա՝ Ադրբեջանի կատարմամբ։ Հիմա, այն ինչ կատարվում է Արցախում, նույն թուրք-ադրբեջանական տանդեմի շարունակական ագրեսիայի արդյունք է։
Նրանք ցանկանում են տակտիկական խնդիրներ լուծել՝ կա՛մ արցախցիներին ստիպել հիասթափության արդյունքում ընդունել Ադրբեջանի գերիշխանությունը, կա՛մ թողնել-հեռանալ իրենց պատմական հայրենիքից՝ հայաթափելով Արցախը։ Կա նաև երրորդ նպատակ՝ գրգռել ողջ հայ ժողովրդին՝ ի վերջո Հայաստանում ևս հասնելու խժդժությունների, այն է՝ Հայաստանը միջամտի այս ամենին, և նոր պատերազմ սկսվի»,- ասաց Բորիս Առուշանյանը։
Արցախցի գործիչը համոզմունք հայտնեց՝ ադրբեջանցիները միանգամից մի քանի նպատակ է հետապնդում, և այս տարիների ընթացքում թշնամին իր ձեռագիրը չի փոխել։
«Ես հիշում եմ. անգամ երեք անգամ մեր կողմից ջախջախվելուց հետո ադրբեջանցիները, բանակ չունենալու պարագայում էլ, քարոզչական դաշտում անընդհատ շեղում էին միջազգային հանրության ուշադրությունը՝ հասնելու իրենց խնդիրների լուծմանը։
Հիմա, ի՞նչ պետք է անի այս պարագայում հայկական կողմը. վերջ տա անընդհատ զիջելու տակտիկային և դիմի ակտիվ գործողությունների, որովհետև մենք, որքան գնանք զիջումների, նրանք ավելի են լկտիանալու։
Ադրբեջանցիների համար միջազգային օրենքներ, իրավունքներ չկան։ Այդ երկիրը մշտապես շեղում է միջազգային հանրության ուշադրությունը՝ գործի դնելով սադրանքների մի ամբողջ արսենալ։ Նրանց արտաքին քաղաքականությունը միշտ նախաձեռնողական է եղել՝ ի տարբերություն մերոնց՝ պաշտպանողականի»,- ասաց Բորիս Առուշանյանը՝ շեշտելով, որ հայկական կողմը պետք է լինի ակտիվ, նախաձեռնող, իսկ շատ դեպքերում էլ՝ նախահարձակ՝ հույսը դնելով միայն մեր պոտենցիալի վրա։
Հիշեցնենք՝ մարտի 5-ին՝ առավոտյան ժամը 10։00-ի սահմաններում, ադրբեջանական զինուժի դիվերսիոն խումբը «Խայփալու» կոչվող տեղանքում թիրախավորել և կրակ է բացել ոստիկանության անձնագրային և վիզաների վարչության անձնակազմի հերթափոխի մեքենայի վրա։
Դիվերսիոն ներթափանցման հետևանքով զոհվել է ոստիկանության 3 ծառայող.
Փոխգնդապետ՝ Արմեն Մայորի Բաբայան
Մայոր՝ Դավիթ Վալերիի Դանիելյան
Լեյտենանտ՝ Արարատ Թելմանի Գասպարյան:
Եվս մեկ ծառայող՝ լեյտենանտ Դավիթ Աշոտի Հովսեփյանը, ստացել է կրծքավանդակի հրազենային վիրավորում։
