ՀՀ պաշտպանության նախարար Սուրեն Պապիկյանն այսօրվա մամուլի ասուլիսի ժամանակ հայտարարեց, որ ՊՆ համակարգում աշխատանքից ազատել է այն ծնողներին, որոնց որդիներն այլ պետությունների քաղաքացիներ են։
Նախարարն անթույլատրելի համարեց երևույթը, որ շատ ծնողներ փորձում են իրենց որդիներին ազատել բանակից։ Պապիկյանը նշեց, որ հորդորել է ինքնուրույն աշխատանքից ազատվել կամ ինքն է ազատել գերատեսչության բոլոր այն աշխատակիցներին, որոնց որդիներն այլ երկրների քաղաքացիներ են։
Հաշվի առնելով անմեղության կանխավարկածը՝ նախարարը միաժամանակ նշեց, որ չի կարող նույն մոտեցումը տարածել հիվանդություն ունեցողների վրա, սակայն կասկածի որդն իրեն կրծում է։
«Կա մի հատված, որը հիվանդությունների հետ կապ չունի։ Սա ազգային անվտանգության հարց է»,- ընդգծեց նախարարը։
Որպես օրինակ նա նշեց գլխուղեղի կիստան։ Պապիկյանի խոսքով՝ այդ «փոքր» հիվանդությունը ցանկից հանելու շնորհիվ հաջողվել է բանակ զորակոչել բազմաթիվ երիտասարդների։
Անդրադառնալով դիտարկմանը, որ վարչապետի մասնակցությամբ մատուցված պատարագին մի շարք զինծառայողներ են մասնակցել, ՀՀ պաշտպանության նախարարը հերքեց այդ լուրերը։
Պապիկյանը հայտարարել է, որ բանակը չի կարող մասնակցել քաղաքական գործընթացների՝ նկատելով, որ լրագրողների կողմից արձանագրվածը ոչ աշխատանքային օրվա ընթացքում զինվորականների՝ սեփական ցանկությամբ միջոցառմանը մասնակցելու երևույթ է եղել։
Խոսելով սեփական մասնակցության մասին՝ նախարարն ընդգծեց, որ ինքը ՀՀ քաղաքացի է, ՔՊ խմբակցության անդամ և պաշտպանության նախարար, և այդ ամենը փոխկապակցված է։
«Ես նաև քաղաքական գործիչ եմ։ Ես զինվորական չեմ, ուսադիրներ չեմ կրում, և սա իմ քաղաքական գործունեության մի մասն է։ Ես մնում եմ իմ դերում և իմ կուսակցության բոլոր որոշումների կողմնակիցն եմ»,- նշեց նախարարը։
