Դատավոր Վահե Դոլմազյանը ավելի քան 5 ժամ քննելուց հետո որոշում կայացրեց ևս 3 ամսով երկարաձգել Սամվել Կարապետյանի տնային կալանքը որոշակի սահմանափակումներով: Միևնույն ժամանակ, նա թույլ չտվեց նաև, որ Կարապետյանը տնային կալանքի պայմաններում գնա Լոռու մարզի Լեռնհովիտ համայնք այցելելու իր հոր շիրիմին:
Դատարանը նաև մի շարք անձանց շրջանակ ներկայացրեց, որոնց հետ արգելվում է, որ Սամվել Կարապետյանը շփում ունենա: Դատարանը, կալանքի տակ թողնելով հանդերձ, վերացրեց Սամվել Կարապետյանի նկատմամբ կիրառված հրապարակային խոսքի արգելքը` թույլ տալով, որ նա հարցազույցներ տա:
«Գործող իշխանություններից այլ որոշում անհնար էր սպասել»,- դատարանում կայացած նիստից հետո լրագրողների հետ զրույցում հայտարարեց «Ուժեղ Հայաստան» կուսակցության ղեկավար, գործարար, բարերար Սամվել Կարապետյանը։
Հարցին, թե Փաշինյանն ասում է` եթե ինքը չգա իշխանության, պատերազմ կլինի, նա պատասխանեց. «Ինքը բուժման կարիք ունի»։
Կարապետյանը պատասխանեց նաև հունիսի 7-ին կայանալիք խորհրդարանական ընտրություններում իր առաջնորդած ուժի շանսերին վերաբերող հարցին։
«Մեր շանսերը գնահատում ենք ուղիղ 100 տոկոս»,- ասաց նա՝ հավելելով, որ իրենք միայն հաղթանակի են գնում։
Հիշեցնենք, որ Սամվել Կարապետյանը կալանքի տակ է ուղիղ 10 ամիս` 2025թ. հունիսի 18-ից։
