Քաղաքագետ Սուրեն Սուրենյանցը գրում է. ՀՀ-ի և Ադրբեջանի սահմանազատման հանձնաժողովներն այսօր ստորագրել են համատեղ գործունեության մասին կանոնակարգը։
Սկսվել է ներպետական ընթացակարգերի իրականացումը։
Ի դեպ, ԱԳՆ-ից խոստանում են, որ ՀՀ-ի և Ադրբեջանի սահմանազատման հանձնաժողովների համատեղ գործունեության կանոնակարգը կհրապարակվի առաջիկա երկուշաբթի։
Այդպիսով, սա այն փաստաթուղթն է, որ Գրիգորյան – Մուստաֆաև ապրիլի 19-ի պրոտոկոլի համաձայն՝ պետք է համաձայնեցված լիներ դեռ հուլիսի 1-ին, բայց փաստորեն գործընթացը երկու ամսով հետաձգվեց:
Ի՞նչն էր դրա պատճառը՝ արդյո՞ք Հայաստանը կարողացել է հասնել նրան, որ այս փաստաթղթով գոնե տեսականորեն հնարավոր կլինի դեօկուպացնել ՀՀ այն տարածքները, որոնք զավթված են Ադրբեջանի կողմից, թե՞ Ադրբեջանը շանտաժի հարկադրանքով հասել է հայկական կողմի հերթական զիջմանը (հիշենք, օրինակ, Բաքվի պարբերական ապատեղեկատվությունները՝ հայկական կողմից հրադադարի իբրև թե խախտման վերաբերյալ):
Թերևս, այս հարցի պատասխանը երկուշաբթի կստանանք:
Մյուս հետաքրքիր հարցն այն է՝ արդյո՞ք այս փաստաթուղթը համաձայնեցվել է արևմտյան միջնորդների հովանու ներքո, որոնց ծափահարությունների ներքո տեղի ունեցավ Տավուշի գործընթացը, թե՞ տեղի ունեցածը կապ ունի տարածաշրջանի ուղղությամբ Պուտինի վերջին ակտիվության հետ:
