Չինաստանի արտաքին գործերի նախարարությունը, մեկնաբանելով Կրեմլի վրա անօդաչու թռչող սարքերով հարձակման փորձը, կոչ է արել Ռուսաստանին և Ուկրաինային խուսափել գործողություններից, որոնք կհանգեցնեն իրավիճակի հետագա սրման։
Այս մասին մայիսի 4-ին հայտարարել է Չինաստանի ԱԳՆ ներկայացուցիչ Մաո Նինը։
Նա նշել է, որ Պեկինի դիրքորոշումը ուկրաինական ճգնաժամի վերաբերյալ հետևողական է և հստակ՝ բոլոր կողմերը պետք է խուսափեն գործողություններից, որոնք կարող են սրել իրավիճակը։
Պատասխանելով այն հարցին, թե արդյոք Կրեմլի միջադեպը կազդի Չինաստանի ներկայացուցչի Ուկրաինա այցի վրա, Նինը պատասխանել է, որ Չինաստանի իշխանությունները ժամանակին կհրապարակեն այդ մասին տեղեկությունը։
«Չինական կողմը կշարունակի աշխատել միջազգային հանրության հետ՝ կառուցողական դեր խաղալու ուկրաինական ճգնաժամի քաղաքական լուծման համար», – հավելել է նախարարության ներկայացուցիչը։
Հիշեցնենք, որ չորեքշաբթի Մոսկվան հայտարարել է Կրեմլի վրա ուկրաինական անօդաչու թռչող սարքերի հարձակման փորձի մասին՝ այն համարելով որպես ծրագրված ահաբեկչություն և մահափորձ Ռուսաստանի նախագահ Վլադիմիր Պուտինի դեմ՝ Հաղթանակի օրվա նախօրեին։
Ուկրաինայի նախագահ Վլադիմիր Զելենսկին վստահեցրել է, որ Կիևը որևէ հարձակում չի կատարել Կրեմլի կամ նրա ղեկավար Պուտինի վրա և զենքն օգտագործում է իր տարածքը պաշտպանելու համար։
