Եթե ոչ Ալմաթայի հռչակագիրը, ապա մեր աշխատանքի համար ո՞ր իրավական հիմքը պետք է բազային դառնա, ԱԺ-ում-ում լրագրողների հետ զրույցում հարց հնչեցրեց փոխվարչապետ Մհեր Գրիգորյանը՝ պատասխանելով այն հարցին, որ եթե Ալմաթայի հռչակագրով որևէ քարտեզ կամ սահման որպես իրավական հիմք նշված չէ, չի՞ նշանակում, որ պայմանավորվածությունները ցանկացած պահի կարող են փլուզվել։
«Եթե չգիտեք, ուրեմն պետք է վստահեք մեզ։ Իսկ ի՞նչ է եղել Կիրանցում։ Ձեր գնահատականներն իրականությանը չեն համապատասխանում: Ո՛չ տարածք ենք տվել, ո՛չ էլ ստացել ենք․ վերականգնվել է սահմանը»,-ասաց նա:
Մհեր Գրիգորյանը միաժամանկ չցանկացավ խոսել Գորիս-Կապան ճանապարհահատվածի մասին։
«Ես կաշկանդված եմ շատ բովանդակային պատասխաներ տալու, քանի որ կա աշխատակարգ, որով հստակ սահմանվում է, որ մնում ենք այն շրջանակներում, որոնք հրապարակվում են: Բայց այո՛, բոլոր հարցերը քննարկվում են»,- ասաց նա:
Փոխվարչապետը միաժամանակ հավաստիացրեց, որ Ադրբեջանի և Հայաստանի սահմանազատման հանձնաժողովների հանդիպումները անցնում են աշխատանքային մթնոլորտում,և Ադրբեջանի կողմից որևէ ճնշում չկա:
Հարցին՝ այդ դեպքում ինչո՞ւ էր Նիկոլ Փաշինյանը Կիրանցում հանդիպման ժամանակ հայտարարում, որ եթե Տավուշում սահմանազատում չանենք, պատերազմ կսկսվի, նա պատասխանեց. «Դուք հարցնում եք իմ վրա, ես էլ ասում եմ՝ իմ վրա սպառնալիք չկա»:
