Որոշել են մի ամբողջ ենթակառուցվածք քայքայել։ Շատերը անգամ գաղափար չունեն՝ որքան կարևոր են մարզային անասնաբուժական լաբորատորիաները, Azg.am-ի թղթակցի հետ զրույցում ասաց «Իրազեկ և պաշտպանված սպառող» ՀԿ նախագահ Բաբկեն Պիպոյանը՝ անդրադառնալով անասնաբուժական մարզային լաբորատորիաների՝ հավանական փակման թեմային։
«Միայն մեկ օրինակ բերեմ՝ բրուցելոզ։ Այս հիվանդությամբ վարակված մարդկանց թիվը տարեցտարի աճում է.այն բավական ծանր ընթացքով հիվանդություն է, և մարզային անասնաբուժական լաբորատորիաները ստուգում էին հենց բրուցելոզի առկայությունը։ Այժմ փակվում է ոչ թե մի քանի կենտրոն, այլ ամբողջ մարզային լաբորատոր շղթան։ Պարզապես ասեմ, որ տարածաշրջանում գոյություն չունի մի պետություն, որտեղ անասնաբուժական բոլոր փորձերը կենտրոնացված լինեն մեկ տեղում, և մարզային ստորաբաժանումներ չլինեն։ Բայց Հայաստանում զարգացում ապահովելու փոխարեն որոշում է կայացվել փակել մարզային անասնաբուժական լաբորատորիաները»,- ասաց Բաբկեն Պիպոյանը։
Ըստ մեր զրուցակցի՝ չի կարելի քմահաճույքներից ելնելով՝ առանցքային փոփոխություններ անելու փոխարեն որոշում կայացել լաբորատորիաներ փակել։
«Անգամ չարաշահումներ իրականացնող լաբորատորիաները ոչ թե պետք է փակել, այլ պետք է դրանցում փոփոխություններ կատարել։
Ինչ վերաբերում է մարզային լաբորատորիաների փակման բուն գործընթացին՝ սկսենք այնտեղից, որ շատ քիչ մասնագետներ են մնացել, անասնաբուժական ֆակուլտետ շատ քիչ դիմորդներ են ընդունվում։ Հաջորդը՝ եթե համաճարակաբանական անկայուն իրավիճակ լինի, և անասնաբուժական կարանտինի արդյունքում մարզերում տեղաշարժը սահմանափակվի, կենդանիների արյան նմուշների տեղափոխությունը ևս լուրջ խնդիրներ է առաջացնելու։
Մյուսը՝ կարող են տեղի ուեննալ վթարներ, որոնց հետևանքով կենդանիների արյան նմուշները կարող են թափվել, և հիվանդություններն այսպիսով տարածվեն. օրինակ՝ չի բացառվում, որ սիբիրախտով հիվանդ կենդանու արյան նմուշը Գեղարքունիքից հասնի Աբովյան, և, փաստորեն, վարակը մարզից մարզ տեղափոխվի»,- ասաց Բաբկեն Պիպոյանը։
Մեր զրուցակիցն իր անասնաբույժ գործընկերներին հորդորեց չլռել մարզային լաբորատորիաների փակման խնդրի առնչությամբ։
«Քայքայվում է մի մեծ ենթակառուցվածք, բազմաթիվ մասնագետներ են աշխատանքը կորցնելու։ Ես հասկանում եմ, որ նրանք բոլորն այսօր պետական ապարատում են աշխատում և որոշակի իմաստով կաշկանդված են, բայց հաշվի առեք մի բան. տարածաշրջանում չկա մի երկիր, որտեղ կլինի նմուշների ստուգման միայն մեկ կենտրոն։
Պետք չէ ոչ մասնագիտական նման մոտեցմամբ ռիսկի տակ դնել բոլորիս։ Ցավոք, մենք ապրում ենք մի իրականության մեջ, երբ քայլերն արվում են՝ հաշվի չառնելով տեսական և պոտենցիալ ռիսկերը, և երբ բախվում են խնդրին, նոր միայն հասկանում են՝ ինչ սխալ արեցին»,- ասաց Բաբկեն Պիպոյանը՝ պատասխանատու կառույցներին հորդորելով վերանայել որոշումը և առնվազն մի քանի մարզային կենտրոն չփակել՝ հետագայում խուսափելու ֆորսմաժորային իրավիճակներից։
Նշենք, որ ըստ մամուլում շրջանառվող լուրերի՝ նախագիծ է շրջանառում` փակելու անասնաբուժական մարզային լաբորատորիաները։
