Մահացել է Ուրուգվայի նախկին նախագահ Խոսե Մուխիկան։ Այս մասին հայտնել Է Ուրուգվայի գործող առաջնորդ Յամանդու Օրսին։
«Խորը ցավով տեղեկացնում ենք մեր գործընկեր Պեպե Մուխիկայի մահվան մասին: Նախագահ, ակտիվիստ, առաջնորդ և ղեկավար: Մենք ձեզ շատ կկարոտենք, թանկագին բարեկամ: Շնորհակալություն այն ամենի համար, ինչ տվել եք մեզ և ձեր ժողովրդի հանդեպ ձեր խորը սիրո համար»,- գրում է Օրսին X սոցիալական ցանցում։
Դեռևս տարեսկզբին Մուխիկան հայտնել էր, որ իր մոտ ախտորոշված քաղցկեղը բուժման ենթակա չէ և հրաժեշտ էր տվել հայրենակիցներին:
Մուխիկան Ուրուգվայի նախագահն էր 2010-ից 2015 թվականներին: Նա հայտնի էր ամբողջ աշխարհում, նրան հարգում էին ոչ միայն ձախ քաղաքական գործիչները, որոնց թվին, իր իսկ խոսքով, պատկանում էր Մուխիկան, այլև աջ հայացքների տեր մարդիկ: Պաշտոնավարման ընթացքում նա վարում էր շատ համեստ կենսակերպ: Ապրում էր կնոջ հետ գյուղական տանը, ուներ 1987 թվականի Volkswagen Beetle և իր գրեթե ամբողջ աշխատավարձը նվիրաբերում էր բարեգործությանը՝ բավարարվելով դրա մեկ տասներորդ մասով: Այդ պատճառով ԶԼՄ-ները նրան սկսեցին անվանել «աշխարհի ամենաաղքատ նախագահ»:
Խոսե Մուխիկան ասում էր.
-Ես աղքատ չեմ: Աղքատները նրանք են, ովքեր կարիք ունեն անսահման քանակությամբ իրերի: Ես բավարարվում եմ քչով, որ ժամանակ ունենամ ապրելու…
Մի քանի օրից Մուխիկան կդառնար իննսուն տարեկան։
