Հինգ տարեկան տղայիս մոտ մեկ ամիս առաջ արտերկրում վիրահատել էին, հետո կոտրվածքի հետ կապված հրատապ խնդիր առաջացավ, որի համար արդեն Հայաստանում բժշկական միջամտություն էր պետք։ Բայց հիվանդանոցում ասացին՝ պետպատվեր չկա, ԱԺ ֆինանսավարկային և բյուջետային հարցերի մշտական հանձնաժողովի նիստին այս մասին ասաց ՔՊ-ական պատգամավոր Էդգար Հակոբյանը։
«Ամեն դեպքում ես հնարավորություն ունեի այդ վճարը կատարելու և վճարեցի, բայց, կարծում եմ, խնդիր կա սոցիալապես անապահով խավի մեր հայրենակիցների համար։ Այդպիսի մարդիկ ի՞նչ պետք է անեին։
Ինձ ասացին՝ պետք է հերթագրվեք, բայց բժիշկն ասաց՝ հրատապ է, պետք է անմիջապես միջամտել։ Ու եթե հերթ պահեի, մոտ մեկ ամսից հերթս կհասներ։ Սա, կարծում եմ, նորմալ չէ»,- ասաց պատգամավորը։
Առողջապահության փոխնախարար Լենա Նանուշյանն ի պատասխան նկատեց, որ ինքը նման խնդրի մասին տեղեկություններ չունի, սակայն փորձում են նման դեպքերում շտկումներ իրականացնել։
Փոխնախարարը միաժամանակ վստահություն հայտնեց, որ համակարգում որևէ խնդիր չկա, և անհետաձգելի բուժօգնությունը երեխաներին տրամադրվում է պետպատվերի շրջանակներում։ Պատգամավորը պնդեց, որ դեպքը տեղի է ունեցել անձամբ իր երեխայի հետ. հնարավոր է, որ փոխնախարարին պարզապես սխալ են զեկուցում։
Էդգար Հակոբյանը պատրաստակամություն հայտնեց Լենա Նանուշյանին փոխանցել ԲԿ-ի տվյալները, որտեղ իր հինգամյա որդուն մերժել են անվճար բուժօգնություն ցուցաբերել։
«Կարծում եմ՝ պետք է գնալ այդ խնդրի հետևից, և կարգավորել հարցը։ Նորմալ չէ, որ եթե գումար չունեն, ստացվում է՝ ոչ մի բան երեխային չպետք է արվի»,- ամփոփեց պատգամավորը։
