Փաստինֆո-ն գրում է.
«GALLUP International Association»-ի Հայաստանում լիիրավ անդամ Էմ Փի ՋԻ ՍՊԸ-ն մայիսի 22-28-ը հեռախոսային հարցում է իրականացրել է 1003 հոգու շրջանում: Հարցերը շրջանակը լայն էր, բայց գրեթե բոլորն էլ ներքաղաքական բնույթի էին։ Հարցին՝ ինչպե՞ս եք գնահատում ՀՀ ներկա քաղաքական իրավիճակը, «լիովին դրական» պատասխանել է հարցվածների 7.3%-ը, իսկ 49.9 %-ը պատասխանել է՝ «ընդհանրապես բացասական»։
Էմ Փի ՋԻ ՍՊԸ տնօրեն Արամ Նավասարդյանը շեշտեց, որ հարցվածների ավելի քան 66 տոկոսը նշել է, որ երկրի քաղաքական վիճակը բացասական է գնահատում։
Հետաքրքրական է, որ հարցվածների 45.7%-ը տեղյակ չէր մայիսի 22-ին Բրյուսելում Շառլ Միշելի, Նիկոլ Փաշինյանի, Իլհամ Ալիևի միջև տեղի ունեցած բանակցությունների մասին։ Առնչվող հարցին՝ ինչպե՞ս եք գնահատում բանակցությունների արդյունքները, հարցվածների 11.2 %-ը պատասխանել է՝ լիովին դրական, իսկ 35.6 %-ը՝ ընդհանրապես բացասական:
«Հարցին՝ արդյոք ձեզ համար ընդունելի՞ է Արցախի բնակչության՝ ազգային փոքրամասնության կարգավիճակի տրամադրումն Ադրբեջանի կազմում, «միանշանակ ընդունելի» է պատասխանել 1.5 %-ը, «ավելի շուտ ընդունելի» 2.9 %-ը, «ավելի շուտ ընդունելի չէ» 6 %-ը, «միանշանակ ընդունելի չէ» 83.3 %-ը, 6.4 %-ը դժվարացել է պատասխանել: Ուշադրություն դարձրեք, որ ավելի քան 90 տոկոսը նշել է, որ այս մոտեցումն իր համար ընդունելի չէ»,-նշեց Արամ Նավասարդյանը։
Հարցմանը մասնակցածների 27,8 տոկոսը նշել է, որ Նիկոլ Փաշինյանը միանշանակ պետք է հրաժարական տա վարչապետի պաշտոնից։ 25,8 տոկոսն էլ գտնում է, որ Փաշինյանը միանշանակ չպետք է հրաժարական տա։
Ընդդիմադիր ուժերի պայքարի մասին հարցին դրական վերաբերմունք է արտահայտել հարցվածների 15.9 %-ը, բացասական՝ 33.3 %-ը: Շուրջ 20 տոկոսը դժվարացել է պատասխանել կամ չի ցանկացել պատասխանել։
Հետաքրքրական է նաև այն, որ հարցվածների 8.2 տոկոսն է նշել, որ ընդդիմության փողոցային պայքարին մասնակցում է, ընդ որում՝ նրանց 4.1 %-ը մարզերից են, 15.5 %-ը՝ Երևանից։
Հարցվածների 27.6 %-ը նշել է, որ երկրում որևէ փոփոխություն պետք չէ, 21 %-ը քաղաքական ներկայիս իրավիճակի հանգուցալուծման ընդունելի տարբերակ է համարել անցումային կառավարության ձևավորումը, իսկ նոր խորհրդարանական ընտրությունների անհրաժեշտություն է տեսնում 26.6 %-ը։
