Հավաքական Արևմուտքը սկսում է Ուկրաինայում միջուկային բաղադրիչով զենք կիրառել. Չինաստանի նախագահ Սի Ցզինպինի հետ Մոսկվայում կայացած բանակցություններից հետո հայտարարել է ՌԴ նախագահ Վլադիմիր Պուտինը։
Խոսելով Ուկրաինա ուրանով արկեր տեղափոխելու՝ Մեծ Բրիտանիայի ծրագրերի մասին՝ ՌԴ ղեկավարն ընդգծել է, որ Ռուսաստանի Դաշնությունը ստիպված կլինի պատասխան քայլեր ձեռնարկել։
«Այսօր հայտնի դարձավ, որ Միացյալ Թագավորությունը երկրի պաշտպանության նախարարության ղեկավարի տեղակալի միջոցով հայտարարել է ոչ միայն Ուկրաինա տանկերի մատակարարման մասին, այլև ուրանով արկերի մասին, կարծես թե Արևմուտքն իսկապես որոշել է կռվել Ռուսաստանի դեմ՝ ոչ թե խոսքով, այլ գործով»,- նշել է Պուտինը։
Ավելի վաղ Մեծ Բրիտանիայի պաշտպանության փոխնախարար, բարոնուհի Աննաբել Գոլդին ասել էր, որ բացի Challenger 2 հիմնական մարտական տանկերից, Ուկրաինան կստանա ուրան պարունակող և բարձր արդյունավետություն ունեցող արկեր։
