Հայաստանը փողի խնդիր չունի, որովհետև լավ է կառավարում ֆինանսները։ Այս մասին ԱԺ ֆինանսավարկային և բյուջետային հանձնաժողովի նիստում այսօր հայտարարեց հանձնաժողովի նախագահ Ծովինար Վարդանյանը՝ ի պատասխան «Հայաստան» խմբակցության պատգամավոր Արթուր Խաչատրյանի այն հարցի, որ եթե ՀՀ նախագահ Վահագն Խաչատուրյանն ասում էր՝ Հայաստանում փողի խնդիր չկա, ինչո՞ւ են Ասիական զարգացման բանկից 45,3 մլն եվրոյի վարկ ներգրավում։
««Շատ փող կա» և «փողի խնդիր չկա» արտահայտությունները էապես տարբեր են. շատ փող չի լինում։ Որևէ միավորի փողի կարողությունները դրանք իր վրա առկա և վարկային հնարավորություններն են, ինչի արդյունքում էլ վարկային միջոցներ ենք կարողանում ներգրավել»,- պատասխանեց ՔՊ-ական պատգամավորը։
Նշենք, որ հանձնաժողովի նիստում քննարկվում է Ասիական զարգացման բանկի հետ «Առողջապահության որակի բարելավման ծրագրի» շրջանակում վարկային պայմանագիր կնքելու վերաբերյալ նախագիծը, որով ՀՀ-ն 45,3 մլն եվրոյի վարկ կստանա բժշկական ծառայությունների բարելավման համար։
