Մինչ Նիկոլ Փաշինյանը և իշխանության քարոզիչները հայտարարում են Կիրանցում սահմանազատման հաջողության մասին, Կիրանցում կյանքը դժոխքի է վերածվում։
Գյուղի բնակիչները զայրացած, շվարած են, նրանք փակել են Կիրանցով ձգվող միջպետական ճանապարհը։ Գյուղի վարչական ղեկավար Կամո Շահինյանը հայտնեց, որ հայ-ադրբեջանական սահմանազատման արձանագրությունը օնլայն կերպով ստորագրվել է, որի հետևանքով միջպետական ավտոճանապարհի Կիրանցի կամուրջը, բազմաթիվ շինություններ անցնելու են Ադրբեջանին, սահմանը անցնելու է Կիրանցի 7-8 առանձնատների կողքով, Կիրանցում կառուցվող, սեպտեմբերին գործարկվելիք դպրոցի շենքից առավելագույնը 50 մետր հեռավորությամբ։ Նա ասաց, որ կյանքը Կիրանցում անհնար է դառնալու։ Վարչական ղեկավարը հայտնեց, որ անելանելի վիճակի պատճառով ինքը ցանկացել է հրաժարական տալ, սակայն գյուղացիները չեն թողել. հայտնում է տավուշցի լրագրող Ոսկան Սարգսյանը։
Կիրանցին իբր վերադարձվող 25 հեկտար հողերը իրականում Կիրանցի բնակիչներին պատկանող, Հայաստանի զինուժի վերահսկողության տակ գտնվող հողեր են, դրանք անցյալ դարի 90-ական թվականներից ականապատ են։ Կամո Շահինյանն ասաց, որ դրանք ականապատել են, որպեսզի գյուղի անվտանգության գոտի ստեղծեն, դրանք այնպես են ականապատված, որ շատ դժվար է լինելու ականազերծելը։
