Որպեսզի ԿԸՀ-ն որևէ քաղաքական ուժի չգրանցի, քաղաքական ուժն ինքը պետք է ցանկանա չգրանցվել, այսօր տեղի ունեցած մամուլի ասուլիսի ժամանակ հայտարարեց ԿԸՀ նախագահ Վահագն Հովակիմյանը՝ անդրադառնալով «Ուժեղ Հայաստան» կուսակցության՝ հնարավոր չգրանցելու վերաբերյալ հարցին։
Հովակիմյանը հիշեցրեց՝ Ընտրական օրենսգիրքը հստակ ներկայացնում է այն փաստաթղթերի ցանկը, որոնք պետք է ներկայացնի կուսակցությունը. եթե այդ ցանկն ամբողջական է, ապա ԿԸՀ-ն գրանցում է քաղաքական ուժին։
«Եթե փաստաթղթերը կիսատ են և 48 ժամվա ընթացքում պակասը չի լրացվում, ապա չգրանցելու հարցը կարող է դրվել քվեարկության»,-ասաց նա։
Հարցին՝ արդյոք ԿԸՀ նախագահը կդիտարկի «Հանրապետություն» կուսակցության՝ դրսից ֆինանսավորվելու հիմքով «Ուժեղ Հայաստան» կուսակցությանը չգրանցելու մասին հարցը, Հովակիմյանը պատասխանեց՝ քաղաքական ուժերը, որքան ուզեն, կարող են միմյանց մեղադրել, կարող են կոչ անել այս կամ այն կուսակցությանը կամ դաշինքին ընտրություններից առաջ չգրանցել։
«Դա չի նշանակում, որ քաղաքական բանավեճը ԿԸՀ-ի գործունեությունն է կանխորոշում»,-նշեց նա։
Վահագն Հովակիմյանը միաժամանակ նշեց, որ ընտրություններին մասնակցող քաղաքական ուժերի գրանցման ընթացակարգը սահմանվում է Ընտրական օրենսգրքով։
«ԿԸՀ-ն հետախուզական, հակահետախուզական, իրավապահ մարմին չէ, որ իր գործունեությունը պայմանավորի դրանով»,- ասաց նա։
ԿԸՀ նախագահը տեղեկացրեց, որ կուսակցությունները և դաշինքները ֆինանսավորվելու են նախընտարական հիմնադրամներից, որի առավելագույն շեմն ԱԺ ընտրույթունների ժամանակ 800 մլն դրամ է։
«Ներդրումներ կարող են կատարել բացառապես կուսակցությունները կամ դաշինքի անդամ կուսակցությունները՝ իրենց պաշտոնական հաշվեհամարներից, իսկ վերջիններիս հաշվեհամարները կարող են ձևավորվել բացառապես ՀՀ քաղաքացիների կատարած նվիրատվություններից, ամեն ՀՀ քաղաքացի կարող է առավելագույնը մեկ տարվա ընթացքում նվիրաբերել 10 մլն դրամից ոչ ավել»,- ասաց նա։
Հովակիմյանը միաժամանակ տեղեկացրեց, որ ՔՕ-ն քրեական պատասխանատվություն է նախատեսում, եթե մեկ անձն այլ անձանց միջոցով կփորձի 10 մլն դրամից ավել նվիրատվություն իրականացնի։
