Կեսարիայի Գեսի թաղամասի մշակույթի և համերաշխության միության նախագահ Աբբաս Յաղջըն հանդես է եկել Կեսարիայում (թուրք․ պաշտոնական անվանումը՝ Կայսերի) գտնվող Սուրբ Ստեփանոս հայկական եկեղեցին վերականգնելու կոչով։ Այս մասին, ըստ www.akunq.net –ի, հաղորդում են թուրքական լրատվամիջոցները։
Աղբյուրի համաձայն՝ Կեսարիայում 17-րդ դարում կառուցված սույն եկեղեցին շարունակաբար ենթարկվում է գանձագողերի ավերածություններին։ Կեսարիայի Մելիքգազի գավառի Գեսի թաղամասում գտնվող Սուրբ Ստեփանոսն սկսել է ավիրվել 1915 թ․ Հայոց ցեղասպանությունից հետո, երբ տեղի հայերին հարկադիր աքսորի են ենթարկել։ Եկեղեցու տարբեր մասերում գանձ որոնողները մեծ փոսեր են փորել, իսկ պատերը՝ ներկել։
Աբբաս Յաղջըն թուրքական «Դեմիրօրեն» լրատվական գործակալության թղթակցի հետ զրույցում հայտնել է, որ մինչև 1915 թ․ հայ բնակիչների կողմից որպես սրբավայր օգտագործված այս կառույցն ունեցել է մի փառահեղ զանգակատուն։ Վերջինս քանդվել է, իսկ գմբեթը՝ ավիրվել։ Յաղջըն նաև ընդգծել է այս պատմական եկեղեցու վերականգնման անհրաժեշտության մասին՝ մասնավորապես նշելով․
«Այս կառույցը մեր պատմական արժեքներից է, որը պետք է պահպանենք։ Մինչև նորագույն պատմություն այն օգտագործվում էր անձանց (նկատի ունի հայերին-Ակունքի խմբ․) կողմից։ Երբ նրանք այստեղից գաղթեցին (Ցեղասպանության ենթարկվեցին-Ակունքի խմբ․) եկեղեցին ավիրվեց գանձագողերի կողմից։ Եկեղեցու ինտերիերին բավականին մեծ վնաս է հասցվել։ Վերջին տարիներին այն վերցվել է մոտակայքում բնակվող հարևանների պահպանության տակ։ Ցանկանում ենք, որ մեր պետությունը ժամ առաջ տեր կանգնի այս վայրին և այն փրկի քանդվելուց։ Պահանջում ենք, որ շինությունը վերականգնվի։ Ուզում ենք, որ մեր Մշակույթի նախարարությունը և գավառապետարանը տեր կանգնեն այս մշակութային ժառանգությանը։ Պատերը ներկվել են։ Պահանջում ենք նաև, որ այդ գրությունները ջնջվեն պատերից»։
