Քննչական կոմիտեն երկարաշունչ հաղորդագրություն է տարածել։ Հարգելով կենդանիների՝ առանց բռնության ենթարկվելու ազատ ապրելու իրավունքը, ինչպես նաև չցանկանալով վիրավորել կենդանասերների հույզերը՝ այնուամենայնիվ, հարկ չենք համարում հրապարակել վերոնշյալ կառույցի հրապարակած ամբողջ հաղորդագրությունը։
Սակայն մի փոքրիկ հատված ներկայացնում ենք ստորև.
«Վերջին շրջանում ահազանգեր են ստացվել Երևան քաղաքի տարբեր հատվածներում և փողոցներում կատուների նկատմամբ դաժան վերաբերմունքի դեպքերի մասին։
Մասնավորապես՝ քաղաքացու կողմից հաղորդում է ստացվել այն մասին, որ Դերենիկ Դեմիրճյան փողոցի շենքերից մեկի հարակից խաղահրապարակում նկատել է մորթազերծ արված կատվի։ Մեկ այլ քաղաքացի նույնաբնույթ հաղորդում է ներկայացրել առ այն, որ մորթազերծ արված կատու է տեսել Թումանյան փողոցում»։
Անմարդկային ու դաժան է նկարագրված պատկերը, ինչպես նաև դատապարտելի։ Բայց կատուների պաշտպանության մասին հաղորդագրություն է տարածել մի կառույց, որի պատերի տակ՝ դրսում, փողոցում, անձրևի տակ, երեկ ամբողջ գիշեր նստացույց են արել 44-օրյա պատերազմում զոհված զինվորների ծնողները։ Ու այդպես էլ ոչ մի պատասխանատու անձ նեղություն չի քաշել նրանց մոտենա, լսի, թե ինչ են ուզում այս որդեկորույս մարդիկ։
Կատուների պաշտպանության մասին երկարաշունչ հաղորդագրություն է տարածել մի կառույց, որին դիմել են այն ծնողները, կանայք, որոնց ոստիկանները Եռաբլուրում կատուների պես ոտքուձեռքից բռնած՝ քարշ տալով բերման են ենթարկել։
ՔԿ-ն կատուների տեսանյութերի հիման վրա արդեն 3 քրեական վարույթ է նախաձեռնել, իսկ մայրերին քարշ տվող ոստիկանների տեսանյութերի հիման վրա՝ ոչ մի։ Այստեղ մեղավորներ չկան։
Արևմտահայ եղեռնազարկ բանաստեղծ մեծն Սիամանթո, գրածդ այսօրվա համար է՝ ո՜վ մարդկային արդարություն, թող ես թքնեմ քու ճակատիդ…
