ԱԺ-ում 2025 թվականի պետական բյուջեի մասին ՀՀ օրենքի նախագծի նախնական քննարկումներ են սկսվել, որոնք կտևեն մինչև նոյեմբերի 5-ը։
Նիկոլ Փաշինյանն ԱԺ-ում է. հանձնաժողովների համատեղ նիստին հանդես է եկել բացման խոսքով։
Փաշինյանը ներկայացրեց պետբյուջեի ընկալումների մասին իր տեսակետերը։ Նա հիշեցրեց, որ 2018 թվականից ի վեր իր բանաձևերն ունի՝ «Հայաստանն իմ օջախն է, հայ ժողովուրդն իր ընտանիքն է», հաջորդը՝ «Հարստացիր և հարստացրու»։ Երրորդը՝ «Հայաստանի ապագան կախված է մեկ մարդուց, և այդ մեկ մարդը դու ես»։
Մի կողմ թողնենք այն, որ ինչպես բազմաթիվ կարգախոսեր, այս երեքն էլ ուղղակի խոսքեր են եղել, Փաշինյանի «օջախ» Հայաստանը 200 քկմ-ով պակասել է, որովհետև ադրբեջանական զորքն է նստած ՀՀ սուվերեն տարածքում, իսկ նրա «ընտանիք» հայ ժողովուրդն իր վրա կրեց պատերազմի արհավիրքը, մինչև հիմա անհետ կորածներ ու գերիներ ունի, իր երկրում իրեն անվտանգ չի զգում ու շարունակ արտագաղթում է։
Փաշինյանն այսօր հիշեցրեց իր 4-րդ բանաձը՝ «Հայրենիքը պետությունն է, սիրո՞ւմ ես Հայրենիքդ, ուժեղացրու պետությունդ»։
Այս կասկածելի բանաձևը քաղաքական ենթատեքստ է պարունակում։ Փաշինյանն ինքն է խոստովանել, որ իր համար Հայրենիքը պետություն է. պատմական Հայրենքիքից հրաժարվելով՝ նա ընտրել է «իրական» Հայրենիքը՝ բզկտված սահմաններով, տարածքներ զիջելու պատրաստակամությամբ։
Այսօր նա այս չարչրկված, կենացային, պաթետիկ «բանաձևերը» նորից է հիշել, որովհետև անորոշության զգացողությամբ ապրող ժողովրդին մանիպուլյացիայով կերակրելու հերթական պահը եկել է։
«Այստեղ պետություն, այստեղ հաց, այստեղ հայրենիք, այստեղ կաց». փաշինյանական 5-րդ բանաձևն է։ Բանաստեղծական հանգավորմամբ այս կարգախոսը ականջահաճո է հանրության այն հատվածի համար, որը քաղաքականությամբ առանձնապես չի հետաքրքրվում, մնացել է 2018 թվականի «հեղափոխության» տակ, որի համար ամեն ինչում նախկիններն են մեղավոր, պատերազմի, զոհերի, սխալ դիվանագիտության, Արցախի հանձնման մեղավորը Փաշինյանը չէ, ուղղակի նրա «գրպանն են գցել»։
Բյուջետային քննարկումները Հայաստանի ղեկավարը նախընտրում է դիտարկել այս կարգախոսերի հիմքի վրա։
«ՀՀ պետական բյուջեն մեր բոլորիս մեծ, ընտանեկան բյուջեն է»,-ասաց Փաշինյանը։
Այս վերջին բանաձևի վերաբերյալ նրա ու թիմակիցների շռայլ ծախսերը վկայում են, որ այո՛, նրանց համար ՀՀ բյուջեն իրենց ընտանեկան, մեծ բյուջեն է։ Մի օրինակ բերենք՝ նրա մեկ հեծանվային արշավն, ըստ մամուլում հրապարակված տեղեկության, արժե 12,5 միլիոն դրամ, որովհետև կադրից դուրս վարչապետին ուղեկցում են մի քանի տասնյակ ավտոմեքենաներ՝ անվտանգության աշխատակիցներով, շտապօգնության մեքենա։ Հավելյալ 25 միլիոն դրամ է դուրս գրվել պետբյուջեից նրա ու նախագահ Խաչատուրյանի արտասահմանյան այցերը պատշաճ կազմակերպելու համար։
