Տավուշի մարզի սահմանամերձ Մովսես գյուղում հիմա համեմատաբար հանգիստ է, խուճապ չկա. հայտնում է գյուղապետ Զավեն Պապյանը։
Ինչպես հայտնի է, հունվարի 19-ի, լույս 20-ի գիշերը Մովսեսում 2-3 անհայտ անձինք ծակել-պատռել են գյուղացիների ավտոմեքենաների, նաև կոմբայնի անվադողերը, հրդեհի մատնել խոտի տուկեր ու դիմել փախուստի։ Գյուղի տղամարդիկ փորձել են հետապնդել, բռնել նրանց, բայց ոչ մի հետք չեն գտել։ Դիմել են իրավապահներին։ Նրանց ուսումնասիրությունները նույնպես մինչ օրս անարդյունք են։
Ովքե՞ր են եղել չարագործները. ոչ ոք պատասխան չունի։
Մովսեսցիները չեն բացառում, որ նրանք ադրբեջանցիներ եղած լինեն, գուցե կատարվածը դիվերսիա է։ Մովսես գյուղի այդ հատվածն ընդամենը 500 մետր է հեռու թշնամուց։ Գուցե եկել են վնաս տալու, վախ ու խուճապ տարածելու։ Բայց քանի որ որևէ փաստ, ապացույց չկա, այս վարկածը ոչ հաստատված է, ոչ էլ՝ հերքված։
Մովսեսցիները ԱԱԾ-ի և ոստիկանության աշխատակիցների հետ շուրջօրյա հերթապահություն են իրականացնում գյուղում։
