Ադրբեջանում հիսթերիայի նոպան սրվել է այն բանից հետո, երբ համացանցում տարածվել է Հայաստան ներթափանցած ադրբեջանցի ահաբեկչին բռնելու տեսանյութը։
Բաքուն պաշտոնապես է հայտարարել, որ իրենց մոտ պահվում է 33 հայ գերի։ Ոչ պաշտոնական տեղեկություններով՝ թիվն անցնում է 200-ը։
Լիբանանահայ Վիգեն Էօլճեքճեանի հետ կարճ հեռախոսազրույցի ընթացքում կինն աղերսագին դիմել է ամբողջ աշխարհին՝ փրկել իր ամուսնուն, որովհետև անպատմելի են ադրբեջանական բանտերում հայերի նկատմամբ իրականացվող կկտանքների, խոշտանգումների դաժանությունները։
Հայ զինվորներին դաժանաբար մորթած, խոշտանգված, գնդակահարած, քառատած, անդամահատած Ադրբեջանն այսօր բողոքում է, թե հայերը ձերբակալել են իբր մառախուղի պատճառով սահմանը հատած ադրբեջանցի զինվորներին ու նրանց նկատմամբ «վատ են վերաբերվել»։
Խոսքն ընդամենը 18 տարեկան այն զինվորի մասին է, որը լցված է անհագ ատելությամբ, Հայաստանի տարածքում 3 օր տիրաբար զբոսնելուց ընթացքում ուղիղ տեսակապով իր ազգակիցների առջև հպարտացել է, թե 400-500 հայ են մորթել ու շարունակելու են բոլոր հայերին սպանել։ Սա այն ադրբեջանցի զինվորն է, որի գրպանվում գտնվել է սպանված կապանցու՝ Հայրապետ Մելիքսեթյանի հեռախոսը։
2,5 տարի հայ գերիների ներկայացուցիչները դիմում են ՄԻԵԴ-ին, միջազգային այլ կառույցների, որպեսզի Ադրբեջանին ստիպեն չխախտել նոյեմբերի 9-ի համաձայնագիրը, ըստ որի՝ այդ երկիրը պետք է վերադարձնի բոլոր գերիներին՝ բոլորը՝ բոլորի դիմաց սկզբունքով։ Բայց մինչ օրս Ադրբեջանն արհամարհում է մարդասիրական բոլոր կոչերը։
Այդ նույն Ադրբեջանն արդեն 4 ամիս բնաջնջման է դատապարտել արցախահայությանը, որոնք սեփական երկրում ոչ միայն ձերբակալված են, այլև բանտարկված, զնդանը նետված։
Ադրբեջանը ԵԱՀԿ/ԺՀՄԻԳ-ին կոչ է արել անհապաղ հետաքննել միջադեպը. «Սա կօգնի մեղավորներին պատասխանատվության ենթարկել միջազգային իրավունքի համաձայն»:
Ավելի վաղ Ադրբեջանի ԱԳՆ-ն կոչ էր արել համաշխարհային հանրությանը դատապարտել Հայաստանում կալանավորված ադրբեջանցի զինվորականների նկատմամբ «անմարդկային վերաբերմունքը»։
Ռազմագերիների, պատանդների և անհայտ կորած քաղաքացիների հարցերով պետական հանձնաժողովը դիմել է միջազգային կազմակերպություններին ադրբեջանական բանակի երկու անհետ կորած զինծառայողների՝ 2004 թվականին ծնված Բաբիրով Ագշին Գաբիլ օղլուի և 2003 թվականին ծնված Ախունդով Հուսեյն Ահլիման օղլուի հետ կապված։
