Երևանը ակնկալում է, որ առաջիկա մի քանի տարիների ընթացքում TRIPP նախագծի միջոցով կհաստատվի դեպի Բաքու ուղիղ երկաթուղային կապ. մամուլի ասուլիսում հայտարարել է Հայաստանի էկոնոմիկայի նախարար Գևորգ Պապոյանը։
Նրա խոսքով՝ մինչև Ադրբեջանի հետ ուղիղ երկաթուղային կապի բացումը կարող են օգտագործվել այլընտրանքային հաղորդակցության տարբերակներ։
«Սա բարդ գործընթաց է, ժամանակ է պահանջում։ Ներկայումս երկրների միջև ակտիվ առևտուր չկա, և դրա համար կան մի քանի պատճառներ. շուկաները դեռևս ծանոթ չեն միմյանց, և առևտրային կապերի հաստատումը ժամանակ է պահանջում», – նշեց նախարարը։
Նա հավելել է, որ պետությունը, իր գործառույթների շրջանակներում, քաղաքական համաձայնագրերի, ճանապարհների բացման և երկաթուղային գծերի շահագործման հանձնման միջոցով ստեղծում է առևտրի համար անհրաժեշտ պայմանները։
Պապոյանը նաև հայտնել է՝ Հայաստանն ու Ադրբեջանը փոխանակվել են ապրանքների ցանկերով և այժմ սպասում են ձեռնարկատերերի պատասխանին։
